བསེ་བསྡུས་ལས་མཚན་མཚོན་གྱི་རྣམ་བཞག
མཚན་མཚོན་གྱི་རྣམ་བཞག་བཤད་པ་ལ།
ཁ་ཅིག་ན་རེ། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་དོན་བྱེད་ནུས་པའི་མཚོན་བྱའི་མཚན་ཉིད་ཡིན་ལ། དོན་བྱེད་ནུས་པའི་བཏགས་ཡོད་ཀྱི་ཆོས་གསུམ་ག་འདྲེན་པའི་ཚེ་ན་སྤྱིར་མཚོན་བྱ་ཡིན་པ། རང་གི་མཚན་གཞིའི་སྟེང་དུ་གྲུབ་པ། དོན་བྱེད་ནུས་པ་མ་ཡིན་པར་གྱུར་པའི་གཞན་གྱི་མཚོན་བྱ་མ་ཡིན་པ་དང་གསུམ་པོ་དེ་འདྲེན་པ་ཡིན་ཟེར་ན། འོ་ན། ཀྭ་བ་ཆོས་ཅན། དོན་བྱེད་ནུས་པའི་མཚོན་བྱ་ཡིན་པར་ཐལ། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་ཡིན་པའི་ཕྱིར། མ་གྲུབ་ན། ཀྭ་བ་ཆོས་ཅན། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་ཡིན་པར་ཐལ། དོན་བྱེད་ནུས་པའི་བཏགས་ཡོད་ཀྱི་ཆོས་གསུམ་ག་ཡིན་པའི་ཕྱིར། མ་གྲུབ་ན། ཀྭ་བ་ཆོས་ཅན། དོན་བྱེད་ནུས་པའི་བཏགས་ཡོད་ཀྱི་ཆོས་གསུམ་ག་ཡིན་པར་ཐལ། སྤྱིར་མཚོན་བྱ་ཡིན་པར་རང་གི་མཚན་གཞིའི་སྟེང་དུ་གྲུབ་པ། དོན་བྱེད་ནུས་པ་མ་ཡིན་པར་གྱུར་བའི་གཞན་གྱི་མཚོན་བྱ་མ་ཡིན་པ་དང་གསུམ་པོ་དེ་ཡིན་པ་གང་ཞིག ། ཁྱོད་ཀྱིས་དེའི་བཏགས་ཡོད་ཀྱི་ཆོས་གསུམ་ག་འདྲེན་པའི་ཚེ་ན་དེ་དྲངས་པའི་ཕྱིར། རྟགས་ཁས། རྟགས་དང་པོ་མ་གྲུབ་ན། ཀྭ་བ་ཆོས་ཅན། སྤྱིར་མཚོན་བྱ་ཡིན་པ། རང་གི་མཚན་གཞིའི་སྟེང་དུ་གྲུབ་པ། དོན་བྱེད་ནུས་པ་མ་ཡིན་པར་གྱུར་བའི་གཞན་གྱི་མཚོན་བྱ་མ་ཡིན་པ་དང་། གསུམ་པོ་དེ་ཡིན་པར་ཐལ། སྤྱིར་མཚོན་བྱ་ཡིན་པ་གང་ཞིག ། རང་གི་མཚན་གཞིའི་སྟེང་དུ་གྲུབ། དོན་བྱེད་ནུས་པ་མ་ཡིན་པར་གྱུར་པའི་གཞན་གྱི་མཚོན་བྱ་མ་ཡིན་པའི་ཕྱིར། རྟགས་དང་པོ་མ་གྲུབ་ན། ཀྭ་བ་ཆོས་ཅན། སྤྱིར་མཚོན་བྱ་ཡིན་པར་ཐལ། ཁྱོད་ཀྱི་མཚན་ཉིད་ཡོད་པའི་ཕྱིར། དེར་ཐལ། གདུང་བཏགས་ཀྱི་དོན་བྱེད་ནུས་པ་དེ་ཡིན་པའི་ཕྱིར། རྟགས་གཉིས་པ་མ་གྲུབ་ན། ཀྭ་བ་ཆོས་ཅན། རང་གི་མཚན་གཞིའི་སྟེང་དུ་གྲུབ་པ་ཡིན་པར་ཐལ། ཁྱོད་ཀྱི་མཚན་གཞི་ཡོད་པའི་ཕྱིར། མ་གྲུབ་ན། ཀྭ་བ་ཆོས་ཅན། ཁྱོད་ཀྱི་མཚན་གཞི་ཡོད་པར་ཐལ། ཙན་དན་གྱི་གདུང་བཏགས་ཀྱི་དོན་བྱེད་ནུས་པ་དེ་ཡིན་པའི་ཕྱིར། རྟགས་གསུམ་པ་མ་གྲུབ་ན། ཀྭ་བ་ཆོས་ཅན། དོན་བྱེད་ནུས་པ་མ་ཡིན་པར་གྱུར་པའི་གཞན་གྱི་མཚོན་བྱ་མ་ཡིན་པར་ཐལ། དོན་བྱེད་ནུས་པ་མ་ཡིན་པར་གྱུར་པའི་ཁྱོད་ཀྱི་མཚན་ཉིད་འཇོག་རྒྱུ་མེད་པའི་ཕྱིར། རྩ་བར་འདོད་ན། དོན་བྱེད་ནུས་པ་ཆོས་ཅན། ཁྱོད་ཀྱི་མཚོན་བྱ་དུ་མ་གྲུབ་པར་ཐལ། དངོས་པོ་དེ་ཁྱོད་ཀྱི་མཚོན་བྱ་ཡིན་པ་གང་ཞིག ། ཀྭ་བ་དེ་ཁྱོད་ཀྱི་མཚོན་བྱ་ཡིན་པའི་ཕྱིར། རྟགས་ཕྱི་མ་ཁས། དང་པོ་མ་གྲུབ་ན། དོན་བྱེད་ནུས་པ་ཆོས་ཅན། དངོས་པོ་ཁྱོད་ཀྱི་མཚོན་བྱ་ཡིན་པར་ཐལ། ཁྱོད་དངོས་པོའི་མཚན་ཉིད་ཡིན་པའི་ཕྱིར། གོང་དུ་འདོད་ན། དོན་བྱེད་ནུས་པ་ཆོས་ཅན། ཁྱོད་ཀྱི་མཚོན་བྱ་དུ་མ་མ་གྲུབ་པར་ཐལ། ཁྱོད་མཚན་ཉིད་ཡིན་པའི་ཕྱིར།
ཁ་ཅིག་ན་རེ། ཤེས་བྱའི་རྫས་ཡོད་ཆོས་གསུམ་ཚང་བ་ཤེས་བྱའི་མཚན་ཉིད་ཀྱི་མཚན་ཉིད་ཡིན་ལ། ཤེས་བྱའི་རྫས་ཡོད་ཀྱི་ཆོས་གསུམ་ག་འདྲེན་པའི་ཚེ་ན། སྤྱིར་མཚན་ཉིད་ཡིན་པ། རང་གི་མཚན་གཞིའི་སྟེང་དུ་གྲུབ་པ། ཤེས་བྱ་མ་ཡིན་པར་གྱུར་བའི་གཞན་གྱི་མཚན་ཉིད་མ་ཡིན་པ་དང་གསུམ་པོ་དེ་འདྲེན་པ་ཡིན་ཟེར་ན། འོ་ན། གཟུགས་རུང་ཆོས་ཅན། ཤེས་བྱའི་རྫས་ཡོད་ཆོས་གསུམ་ཚང་བ་ཡིན་པར་ཐལ། ཤེས་བྱའི་རྫས་ཡོད་ཀྱི་ཆོས་གསུམ་ག་ཡིན་པའི་ཕྱིར། མ་གྲུབ་ན། གཟུགས་རུང་ཆོས་ཅན། ཤེས་བྱའི་རྫས་ཡོད་ཀྱི་ཆོས་གསུམ་ག་ཡིན་པར་ཐལ། སྤྱིར་མཚན་ཉིད་ཡིན་པ། རང་གི་མཚན་གཞིའི་སྟེང་དུ་གྲུབ་པ། ཤེས་བྱ་མ་ཡིན་པར་གྱུར་པའི་གཞན་གྱི་མཚན་ཉིད་མ་ཡིན་པ་དང་གསུམ་པོ་དེ་ཡིན་པ་གང་ཞིག ། ཁྱོད་ཀྱིས་ཤེས་བྱའི་རྫས་ཡོད་ཀྱི་ཆོས་གསུམ་ག་འདྲེན་པའི་ཚེ་ན་དེ་གསུམ་པོ་དྲངས་པའི་ཕྱིར། རྟགས་ཁས། རྟགས་དང་པོ་མ་གྲུབ་ན། གཟུགས་རུང་ཆོས་ཅན། སྤྱིར་མཚན་ཉིད་ཡིན་པ། རང་གི་མཚན་གཞིའི་སྟེང་དུ་གྲུབ་པ། ཤེས་བྱ་མ་ཡིན་པར་གྱུར་པའི། གཞན་གྱི་མཚན་ཉིད་མ་ཡིན་པ་དང་གསུམ་པོ་དེ་ཡིན་པར་ཐལ། སྤྱིར་མཚན་ཉིད་ཡིན་པ་གང་ཞིག ། རང་གི་མཚན་གཞིའི་སྟེང་དུ་གྲུབ། ཤེས་བྱ་མ་ཡིན་པར་གྱུར་བའི་གཞན་གྱི་མཚན་ཉིད་མ་ཡིན་པའི་ཕྱིར། རྟགས་དང་པོ་མ་གྲུབ་ན། གཟུགས་རུང་ཆོས་ཅན། སྤྱིར་མཚན་ཉིད་ཡིན་པར་ཐལ། མཚན་ཉིད་ཡིན་པའི་ཕྱིར། དེར་ཐལ། གཟུགས་ཀྱི་མཚན་ཉིད་ཡིན་པའི་ཕྱིར། རྟགས་གཉིས་པ་མ་གྲུབ་ན། གཟུགས་རུང་ཆོས་ཅན། རང་གི་མཚན་གཞིའི་སྟེང་དུ་གྲུབ་པ་ཡིན་པར་ཐལ། སྒྲའི་སྟེང་དུ་གྲུབ་པ་ཡིན་པ་གང་ཞིགསྒྲ་ཁྱོད་ཀྱི་མཚན་གཞི་ཡིན་པའི་ཕྱིར། རྟགས་དང་པོ་མ་གྲུབ་ན། གཟུགས་རུང་ཆོས་ཅན། སྒྲའི་སྟེང་དུ་གྲུབ་པ་ཡིན་པར་ཐལ། སྒྲ་ཁྱོད་ཡིན་པའི་ཕྱིར། རྟགས་གསུམ་པ་མ་གྲུབ་ན། གཟུགས་རུང་ཆོས་ཅན། ཤེས་བྱ་མ་ཡིན་པར་གྱུར་པའི་གཞན་གྱི་མཚན་ཉིད་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར། རྩ་བར་འདོད་ན། གཟུགས་རུང་ཆོས་ཅན། ཤེས་བྱའི་མཚན་ཉིད་ཡིན་པར་ཐལ། ཤེས་བྱའི་རྫས་ཡོད་ཆོས་གསུམ་ཚང་བ་ཡིན་པའི་ཕྱིར། རྟགས་ཁས། འདོད་ན། ཤེས་བྱ་ཆོས་ཅན། ཁྱོད་ཀྱི་མཚན་ཉིད་དུ་མ་གྲུབ་པར་ཐལ། བློའི་ཡུལ་དུ་བྱ་རུང་དེ་ཡིན་པ་གང་ཞིག ། གཟུགས་རུང་དེ་ཡིན་པའི་ཕྱིར། འདོད་ན། ཤེས་བྱ་ཆོས་ཅན། ཁྱོད་ཀྱི་མཚན་ཉིད་དུ་མ་མ་གྲུབ་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར།
ཁ་ཅིག་ན་རེ། དོན་བྱེད་ནུས་པའི་བཏགས་ཡོད་ཀྱི་ཆོས་གསུམ་པོ་གང་རུང་ཡིན་ན་བློའི་ཡུལ་དུ་བྱ་རུང་གི་བཏགས་ཡོད་ཀྱི་ཆོས་གསུམ་པོ་གང་རུང་མ་ཡིན་པས་ཁྱབ་ཟེར་ན། སྤྱིར་མཚོན་བྱ་ཡིན་པ་ཆོས་ཅན། བློའི་ཡུལ་དུ་བྱ་རུང་གི་བཏགས་ཡོད་ཀྱི་ཆོས་གསུམ་པོ་གང་རུང་མ་ཡིན་པར་ཐལ། དོན་བྱེད་ནུས་པའི་བཏགས་ཡོད་ཀྱི་ཆོས་གསུམ་པོ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྤྱིར་མཚོན་བྱ་ཡིན་པ་ཆོས་ཅན། དོན་བྱེད་ནུས་པའི་བཏགས་ཡོད་ཀྱི་ཆོས་གསུམ་པོ་གང་རུང་ཡིན་པར་ཐལ། དོན་བྱེད་ནུས་པའི་བཏགས་ཡོད་ཀྱི་ཆོས་གསུམ་པོ་འདྲེན་པའི་ཚེ་ན་ཁྱོད་གཅིག་ལ་འདྲེན་དགོས་པའི་ཕྱིར། ཁ་ཅིག་ན་རེ། ལྟོ་ལྡིར་བའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚོན་བྱ་ཡིན་པའི་གཞི་མཐུན་པ་མེད་ཟེར་ན། དེ་ཡོད་པར་ཐལ། བུམ་པའི་མཚན་ཉིད་དེ་ཡིན་པའི་ཕྱིར། མ་གྲུབ་ན། བུམ་པའི་མཚན་ཉིད་ཆོས་ཅན། ཁྱོད་ལྟོ་ལྡིར་བའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚོན་བྱ་ཡིན་པའི་གཞི་མཐུན་པ་ཡིན་པར་ཐལ། ཁྱོད་ལྟོ་ལྡིར་བའི་ལྡོག་པ་དང་ཡིན་ཁྱབ་མཉམ་ཡིན་པ་གང་ཞིག ། མཚོན་བྱ་ཡིན་པའི་ཕྱིར། རྟགས་དང་པོ་མ་གྲུབ་ན། བུམ་པའི་མཚན་ཉིད་ཆོས་ཅན། ལྟོ་ལྡིར་བའི་ལྡོག་པ་དང་ཡིན་ཁྱབ་མཉམ་ཡིན་པར་ཐལ། ཁྱོད་ཡིན་ན་ལྟོ་ལྡིར་བའི་ལྡོག་པ་ཡིན་པས་ཁྱབ། ལྟོ་ལྡིར་བའི་ལྡོག་པ་ཡིན་ན་ཁྱོད་ཡིན་པས་ཁྱབ་པའི་ཕྱིར། རྟགས་དང་པོ་མ་གྲུབ་ན། བུམ་པ་ཆོས་ཅན། ཁྱོད་ཀྱི་མཚན་ཉིད་ཡིན་ན། ལྟོ་ལྡིར་བའི་ལྡོག་པ་ཡིན་པས་ཁྱབ་པར་ཐལ། ལྟོ་ལྡིར་བ་ཁྱོད་ཀྱི་མཚན་ཉིད་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ལྟོ་ལྡིར་བ་ཁྱོད་ཀྱི་མཚན་ཉིད་ཡིན་པར་ཐལ། ཁྱོད་ལྟོ་ལྡིར་བའི་མཚོན་བྱ་ཡིན་པའི་ཕྱིར། རྟགས་གཉིས་པ་མ་གྲུབ་ན། ལྟོ་ལྡིར་པ་ཆོས་ཅན། ཁྱོད་ཀྱི་ལྡོག་པ་ཡིན་ན། བུམ་པའི་མཚན་ཉིད་ཡིན་པས་ཁྱབ་པར་ཐལ། ཁྱོད་བུམ་པའི་མཚན་ཉིད་ཡིན་པའི་ཕྱིར། གོང་གི་རྟགས་གཉིས་པ་མ་གྲུབ་ན། བུམ་པའི་མཚན་ཉིད་ཆོས་ཅན། མཚོན་བྱ་ཡིན་པར་ཐལ། ཁྱོད་ཀྱི་མཚན་ཉིད་ཡོད་པའི་ཕྱིར། མ་གྲུབ་ན། བུམ་པའི་མཚན་ཉིད་ཆོས་ཅན། ཁྱོད་ཀྱི་མཚན་ཉིད་ཡོད་པར་ཐལ། བུམ་པའི་རྫས་ཡོད་ཆོས་གསུམ་ཚང་པ་དེ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་ཀྱི་རྫས་ཡོད་ཆོས་གསུམ་ཚང་བ་ཁྱོད་ཀྱི་མཚན་ཉིད་ཀྱི་མཚན་ཉིད་ཡིན་པར་ཐལ། ཁྱོད་མཚོན་བྱ་ཡིན་པའི་ཕྱིར།
ཁ་ཅིག་ན་རེ། དངོས་པོའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚན་ཉིད་ཡིན་པའི་གཞི་མཐུན་པ་མེད་ཟེར་ན་དེ་ཡོད་པར་ཐལ། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་དེ་ཡིན་པའི་ཕྱིར། མ་གྲུབ་ན། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་ཆོས་ཅན། ཁྱོད་དངོས་པོའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚན་ཉིད་ཡིན་པའི་གཞི་མཐུན་པ་ཡིན་པར་ཐལ། ཁྱོད་དངོས་པོའི་ལྡོག་པ་དང་ཡིན་ཁྱབ་མཉམ་ཡིན་པ་གང་ཞིག ། མཚན་ཉིད་ཡིན་པའི་ཕྱིར། རྟགས་དང་པོ་མ་གྲུབ་ན། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་ཆོས་ཅན། ཁྱོད་དངོས་པོའི་ལྡོག་པ་དང་ཡིན་ཁྱབ་མཉམ་ཡིན་པར་ཐལ། ཁྱོད་ཡིན་ན་དངོས་པོའི་ལྡོག་པ་ཡིན་པས་ཁྱབ། དངོས་པོའི་ལྡོག་པ་ཡིན་ན་ཁྱོད་ཡིན་པས་ཁྱབ་པའི་ཕྱིར། རྟགས་དང་པོ་མ་གྲུབ་ན། དོན་བྱེད་ནུས་པ་ཆོས་ཅན། ཁྱོད་ཀྱི་བཏགས་ཡོད་ཆོས་གསུམ་ཚང་བ་ཡིན་ན་དངོས་པོའི་ལྡོག་པ་ཡིན་པས་ཁྱབ་པར་ཐལ། ཁྱོད་ཀྱི་མཚོན་བྱ་ཡིན་ན་དངོས་པོའི་ལྡོག་པ་ཡིན་པས་ཁྱབ་པའི་ཕྱིར། མ་གྲུབ་ན། དོན་བྱེད་ནུས་པ་ཆོས་ཅན། ཁྱོད་ཀྱི་མཚོན་བྱ་ཡིན་ན་དངོས་པོའི་ལྡོག་པ་ཡིན་པས་ཁྱབ་པར་ཐལ། ཁྱོད་དངོས་པོའི་མཚན་ཉིད་ཡིན་པའི་ཕྱིར། རྟགས་གཉིས་པ་མ་གྲུབ་ན། དངོས་པོ་ཆོས་ཅན། ཁྱོད་ཀྱི་ལྡོག་པ་ཡིན་ན། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་ཡིན་པས་ཁྱབ་པར་ཐལ། ཁྱོད་དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། ཁྱོད་དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་ཡིན་པར་ཐལ། ཁྱོད་དོན་བྱེད་ནུས་པའི་མཚོན་བྱ་ཡིན་པའི་ཕྱིར༑ གོང་གི་རྟགས་གཉིས་པ་མ་གྲུབ་ན། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་ཆོས་ཅན། མཚན་ཉིད་ཡིན་པར་ཐལ། དོན་བྱེད་ནུས་པའི་མཚོན་བྱའི་མཚན་ཉིད་ཡིན་པའི་ཕྱིར། མ་གྲུབ་ན། དོན་བྱེད་ནུས་པ་ཆོས་ཅན། ཁྱོད་ཀྱི་བཏགས་ཡོད་ཆོས་གསུམ་ཚང་བ་ཁྱོད་ཀྱི་མཚོན་བྱའི་མཚན་ཉིད་ཡིན་པར་ཐལ། ཁྱོད་མཚན་ཉིད་ཡིན་པའི་ཕྱིར།
ཁ་ཅིག་ན་རེ། རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚན་ཉིད་ཡིན་པའི་གཞི་མཐུན་པ་མེད་ཟེར་ན་དེ་ཡོད་པར་ཐལ། རི་བོང་རྭའི་མཚན་ཉིད་མ་ཡིན་པའི་རྫས་ཡོད་ཆོས་གསུམ་ཚང་བ་དེ་ཡིན་པའི་ཕྱིར། མ་གྲུབ་ན། རི་བོང་རྭའི་མཚན་ཉིད་མ་ཡིན་པའི་རྫས་ཡོད་ཆོས་གསུམ་ཚང་བ་ཆོས་ཅན། ཁྱོད་རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚན་ཉིད་ཡིན་པའི་གཞི་མཐུན་པ་ཡིན་པར་ཐལ། ཁྱོད་རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་དང་ཡིན་ཁྱབ་མཉམ་ཡིན་པ་གང་ཞིག ། མཚན་ཉིད་ཡིན་པའི་ཕྱིར། རྟགས་དང་པོ་མ་གྲུབ་ན། རི་བོང་རྭའི་མཚན་ཉིད་མ་ཡིན་པའི་རྫས་ཡོད་ཆོས་གསུམ་ཚང་བ་ཆོས་ཅན། ཁྱོད་རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་དང་ཡིན་ཁྱབ་མཉམ་ཡིན་པར་ཐལ། ཁྱོད་ཡིན་ན་རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་ཡིན་པས་ཁྱབ། རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་ཡིན་ན་ཁྱོད་ཡིན་པས་ཁྱབ་པའི་ཕྱིར། རྟགས་དང་པོ་མ་གྲུབ་ན། རི་བོང་རྭའི་མཚན་ཉིད་མ་ཡིན་པ་ཆོས་ཅན། ཁྱོད་ཀྱི་རྫས་ཡོད་ཆོས་གསུམ་ཚང་བ་ཡིན་ན། རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་ཡིན་པས་ཁྱབ་པར་ཐལ། ཁྱོད་ཀྱི་མཚན་ཉིད་ཡིན་ན་རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་ཡིན་པས་ཁྱབ་པའི་ཕྱིར། མ་གྲུབ་ན། རི་བོང་རྭའི་མཚན་ཉིད་མ་ཡིན་པ་ཆོས་ཅན། ཁྱོད་ཀྱི་མཚན་ཉིད་ཡིན་ན་རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་ཡིན་པས་ཁྱབ་པར་ཐལ། ཁྱོད་རི་བོང་རྭའི་རྫས་ཡོད་ཆོས་གསུམ་མ་ཚང་བའི་མཚོན་བྱ་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཁྱོད་ཀྱི་མཚན་ཉིད་མ་ཡིན་པ། ཁྱོད་ཀྱི་རྫས་ཡོད་ཆོས་གསུམ་མ་ཚང་བའི་མཚོན་བྱ་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། རྟགས་གཉིས་པ་མ་གྲུབ་ན། རི་བོང་རྭའི་རྫས་ཡོད་ཆོས་གསུམ་མ་ཚང་བ་ཆོས་ཅན། ཁྱོད་ཀྱི་ལྡོག་པ་ཡིན་ན་རི་བོང་རྭའི་མཚན་ཉིད་མ་ཡིན་པའི་རྫས་ཡོད་ཆོས་གསུམ་ཚང་བ་ཡིན་པས་ཁྱབ་པར་ཐལ། ཁྱོད་རི་བོང་རྭའི་མཚན་ཉིད་མ་ཡིན་པའི་རྫས་ཡོད་ཆོས་གསུམ་ཚང་བ་ཡིན་བའི་ཕྱིར། མ་གྲུབ་ན། རི་བོང་རྭའི་རྫས་ཡོད་ཆོས་གསུམ་མ་ཚང་བ་ཆོས་ཅན། ཁྱོད་རི་བོང་རྭའི་མཚན་ཉིད་མ་ཡིན་པའི་རྫས་ཡོད་ཆོས་གསུམ་ཚང་བ་ཡིན་པར་ཐལ། ཁྱོད་རི་བོང་རྭའི་མཚན་ཉིད་མ་ཡིན་པའི་མཚན་ཉིད་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཁྱོད་ཀྱི་རྫས་ཡོད་ཆོས་གསུམ་མ་ཚང་བ་ཁྱོད་ཀྱི་མཚན་ཉིད་མ་ཡིན་པའི་མཚན་ཉིད་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། གོང་གི་རྟགས་གཉིས་པ་མ་གྲུབ་ན། རི་བོང་རྭའི་མཚན་ཉིད་མ་ཡིན་པའི་རྫས་ཡོད་ཆོས་གསུམ་ཚང་བ་ཆོས་ཅན། མཚན་ཉིད་ཡིན་པར་ཐལ། རི་བོང་རྭའི་མཚན་ཉིད་མ་ཡིན་པའི་མཚན་ཉིད་ཀྱི་མཚན་ཉིད་ཡིན་པའི་ཕྱིར། མ་གྲུབ་ན། རི་བོང་རྭའི་མཚན་ཉིད་མ་ཡིན་པ་ཆོས་ཅན། ཁྱོད་ཀྱི་རྫས་ཡོད་ཆོས་གསུམ་ཚང་བ་ཁྱོད་ཀྱི་མཚན་ཉིད་ཀྱི་མཚན་ཉིད་ཡིན་པར་ཐལ། ཁྱོད་མཚོན་བྱ་ཡིན་པའི་ཕྱིར། ཁ་ཅིག་ན་རེ། བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚོན་བྱ་ཡིན་པའི་གཞི་མཐུན་པ་མེད་ཟེར་ན། དེ་ཡོད་པར་ཐལ། བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་མཚོན་བྱའི་མཚན་ཉིད་དེ་ཡིན་པའི་ཕྱིར། མ་གྲུབ་ན། བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་མཚོན་བྱའི་མཚན་ཉིད་ཆོས་ཅན། ཁྱོད་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚོན་བྱ་ཡིན་པའི་གཞི་མཐུན་པ་ཡིན་པར་ཐལ། ཁྱོད་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་ལྡོག་པ་དང་ཡིན་ཁྱབ་མཉམ་ཡིན་པ་གང་ཞིག ། མཚོན་བྱ་ཡིན་པའི་ཕྱིར། རྟགས་དང་པོ་མ་གྲུབ་ན། བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་མཚོན་བྱའི་མཚན་ཉིད་ཆོས་ཅན། ཁྱོད་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་ལྡོག་པ་དང་ཡིན་ཁྱབ་མཉམ་ཡིན་པར་ཐལ། བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་ལྡོག་པ་ཡིན་ན་ཁྱོད་ཡིན་པས་ཁྱབ་པ། ཁྱོད་ཡིན་ན་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་ལྡོག་པ་ཡིན་པའི་ཁྱབ་པའི་ཕྱིར། རྟགས་དང་པོ་མ་གྲུབ་ན། བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བ་ཆོས་ཅན། ཁྱོད་ཀྱི་ལྡོག་པ་ཡིན་ན་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་མཚོན་བྱའི་མཚན་ཉིད་ཡིན་པས་ཁྱབ་པར་ཐལ། ཁྱོད་བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བའི་མཚོན་བྱའི་མཚན་ཉིད་ཡིན་པའི་ཕྱིར། མ་གྲུབ་ན། བཏགས་ཡོད་ཆོས་གསུམ་ཚང་བའི་བཏགས་ཡོད་ཆོས་གསུམ་ཚང་བ་ཆོས་ཅན། ཁྱོད་ཀྱི་བཏགས་ཡོད་ཆོས་གསུམ་ཚང་བ་ཁྱོད་ཀྱི་མཚོན་བྱའི་མཚན་ཉིད་ཡིན་པར་ཐལ། ཁྱོད་མཚན་ཉིད་ཡིན་པའི་ཕྱིར། །
རྩོམ་སྒྲིག་པ། བློ་བཟང་བཀྲ་ཤིས།