བསེ་བསྡུས་ལས་རང་ལུགས་ཀྱི་རྫས་ལྡོག་གི་རྣམ་བཞག
རང་ལུགས་ཀྱི་རྫས་ལྡོག་གི་རྣམ་བཞག་བཤད་པ་ལ།
ཁ་ཅིག་ན་རེ། ཀྭ་བུམ་གཉིས་ཆོས་ཅན། ཁྱོད་ཁྱོད་རང་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། ཀྭ་བུམ་གཉིས་ཆོས་ཅན། རྫས་ཆོས་ཡིན་པར་ཐལ། རྫས་ཡོད་ཡིན་པའི་ཕྱིར། མ་གྲུབ་ན། ཀྭ་བུམ་གཉིས་ཆོས་ཅན། རྫས་ཡོད་ཡིན་པར་ཐལ། དོན་བྱེད་ནུས་པའི་རྫས་ཡོད་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དངོས་པོ་དང་རྫས་ཆོས་དང་རྫས་ཡོད་རྣམས་དོན་གཅིག་ཡིན་པའི་ཕྱིར།
ཁ་ཅིག་ན་རེ། ཀྭ་བུམ་གཉིས་ཆོས་ཅན། རྫས་ཆོས་མ་ཡིན་པར་ཐལ། ལྡོག་ཆོས་ཡིན་པའི་ཕྱིར། མ་གྲུབ་ན། ཀྭ་བུམ་གཉིས་ཆོས་ཅན། ལྡོག་ཆོས་ཡིན་པར་ཐལ། རང་མ་ཡིན་པའི་ལྡོག་ཆོས་ཡིན་པའི་ཕྱིར་ཟེར་ན་མ་ཁྱབ། གོང་དུ་འདོད་ན། ཀྭ་བུམ་གཉིས་ཆོས་ཅན། ལྡོག་ཆོས་མ་ཡིན་པར་ཐལ། བཏགས་ཡོད་མ་ཡིན་པའི་ཕྱིར། མ་གྲུབ་ན། ཀྭ་བུམ་གཉིས་ཆོས་ཅན། བཏགས་ཡོད་མ་ཡིན་པར་ཐལ། རྟག་པ་མ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ལྡོག་ཆོས་དང་བཏགས་ཡོད་དང་རྟག་པ་གསུམ་དོན་གཅིག་ཡིན་པའི་ཕྱིར།
ཁ་ཅིག་ན་རེ། རྫས་ཡོད་བཞི་པོ་གང་རུང་ཡིན་ན་རྫས་ཡོད་ཡིན་པས་ཁྱབ་ཟེར་ན། འདུས་མ་བྱས་ཀྱི་ནམ་མཁའ་ཆོས་ཅན། རྫས་ཡོད་ཡིན་པར་ཐལ། རྫས་ཡོད་བཞི་པོ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། རྫས་ཡོད་བཞི་པོ་གང་རུང་ཡིན་པར་ཐལ། རིགས་པས་གྲུབ་པའི་རྫས་ཡོད་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། རིགས་པས་གྲུབ་པའི་རྫས་ཡོད་ཡིན་པར་ཐལ། རིགས་པས་གྲུབ་པའི་ཆོས་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། རིགས་པས་གྲུབ་པའི་ཆོས་ཡིན་པར་ཐལ། ཚད་མས་གྲུབ་པའི་ཆོས་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། ཚད་མས་གྲུབ་པའི་ཆོས་ཡིན་པར་ཐལ། གཞི་གྲུབ་པའི་ཕྱིར། རྩ་བར་འདོད་ན། འདུས་མ་བྱས་ཀྱི་ནམ་མཁའ་ཆོས་ཅན། རྫས་ཡོད་མ་ཡིན་པར་ཐལ། བཏགས་ཡོད་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། བཏགས་ཡོད་ཡིན་པར་ཐལ། རྟོག་པས་བཏགས་ཙམ་གྱི་ཆོས་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། རྟག་པས་བཏགས་ཙམ་གྱི་ཆོས་ཡིན་པར་ཐལ། རྟག་པ་ཡིན་པའི་ཕྱིར།
གཞན་ཡང་། རྟག་པ་ཆོས་ཅན། རྫས་ཡོད་ཡིན་པར་ཐལ། རྫས་ཡོད་བཞི་པོ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྟག་པ་ཆོས་ཅན། རྫས་ཡོད་བཞི་པོ་གང་རུང་ཡིན་པར་ཐལ། བརྟན་པ་མི་འགྱུར་བའི་རྫས་ཡོད་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། བརྟན་པ་མི་འགྱུར་བའི་རྫས་ཡོད་ཡིན་པར་ཐལ༑ རྟག་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བརྟན་པ་མི་འགྱུར་བའི་རྫས་ཡོད་དང་རྟག་པ་གཉིས་དོན་གཅིག་ཡིན་པའི་ཕྱིར། རྩ་བར་འདོད་ན། རྟག་པ་ཆོས་ཅན། རྫས་ཡོད་མ་ཡིན་པར་ཐལ། རྫས་ཆོས་མ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། རྫས་ཆོས་མ་ཡིན་པར་ཐལ། རྫས་དང་ཆོས་གཉིས་ཀ་མ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། རྫས་དང་ཆོས་གཉིས་ཀ་མ་ཡིན་པར་ཐལ། རྫས་མ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། རྫས་མ་ཡིན་པར་ཐལ། དངོས་པོ་མ་ཡིན་པའི་ཕྱིར།
ཁ་ཅིག་ན་རེ། རྫས་ཡོད་ཡིན་ན་རང་རྒྱ་འཛིན་ཐུབ་པའི་རྫས་ཡོད་ཡིན་པས་ཁྱབ་ཟེར་ན། གང་ཟག་ཆོས་ཅན། རང་རྒྱ་འཛིན་ཐུབ་པའི་རྫས་ཡོད་ཡིན་པར་ཐལ། རྫས་ཡོད་ཡིན་པའི་ཕྱིར། ཁྱབ་པ་ཁས། མ་གྲུབ་ན། གང་ཟག་ཆོས་ཅན། རྫས་ཡོད་ཡིན་པར་ཐལ། དོན་བྱེད་ནུས་པའི་རྫས་ཡོད་ཡིན་པའི་ཕྱིར། མ་གྲུབ་ན། གང་ཟག་ཆོས་ཅན། དོན་བྱེད་ནུས་པའི་རྫས་ཡོད་ཡིན་པར་ཐལ། དངོས་པོ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དངོས་པོ་དང་རྫས་ཆོས་དང་རྫས་ཡོད་དང་དོན་བྱེད་ནུས་པའི་རྫས་ཡོད་བཞི་དོན་གཅིག་ཡིན་པའི་ཕྱིར། རྩ་བར་འདོད་ན། གང་ཟག་ཆོས་ཅན། རང་རྒྱ་འཛིན་ཐུབ་པའི་རྫས་ཡོད་མ་ཡིན་པར་ཐལ། རང་རྒྱ་འཛིན་མི་ཐུབ་པའི་བཏགས་ཡོད་ཡིན་པའི་ཕྱིར། མ་གྲུབ་ན། གང་ཟག་ཆོས་ཅན། རང་རྒྱ་འཛིན་མི་ཐུབ་པའི་བཏགས་ཡོད་ཡིན་པར་ཐལ། རང་ཉིད་ཚད་མས་ངེས་པར་རང་གི་ངོ་བོར་མ་གྱུར་བའི་ཆོས་གཞན་ཚད་མས་ངེས་པ་ལ་ལྟོས་དགོས་པའི་ཆོས་ཡིན་པའི་ཕྱིར། མ་གྲུབ་ན། གང་ཟག་ཆོས་ཅན། རང་ཉིད་ཚད་མས་ངེས་པ་རང་གི་ངོ་བོར་མ་གྱུར་པའི་ཆོས་གཞན་ཚད་མས་ངེས་པ་ལ་ལྟོས་དགོས་པའི་ཆོས་ཡིན་པར་ཐལ། ལྡན་མིན་འདུ་བྱེད་ཡིན་པའི་ཕྱིར།
ཁ་ཅིག་ན་རེ། དངོས་པོ་ཡིན་ན་རང་རྒྱ་འཛིན་མི་ཐུབ་པའི་བཏགས་ཡོད་ཡིན་པས་ཁྱབ་ཟེར་ན། སྒྲ་ཆོས་ཅན། རང་རྒྱ་འཛིན་མི་ཐུབ་པའི་བཏགས་ཡོད་ཡིན་པར་ཐལ། དངོས་པོ་ཡིན་པའི་ཕྱིར། ཁྱབ་པ་ཁས། འདོད་ན། སྒྲ་ཆོས་ཅན། ཡོད་མ་ཡིན་པར་ཐལ། རང་རྒྱ་འཛིན་ཐུབ་པའི་རྫས་ཡོད་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། རང་རྒྱ་འཛིན་ཐུབ་པའི་རྫས་ཡོད་ཡིན་པར་ཐལ། རང་ཉིད་ཚད་མས་ངེས་པ་རང་གི་ངོ་བོར་མ་གྱུར་བའི་ཆོས་གཞན་ཚད་མས་ངེས་པ་ལ་ལྟོས་མི་དགོས་པའི་ཆོས་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། རང་ཉིད་ཚད་མས་ངེས་པ་རང་གི་ངོ་བོར་མ་གྱུར་བའི་ཆོས་གཞན་ཚད་མས་ངེས་པ་ལ་ལྟོས་མི་དགོས་པའི་ཆོས་ཡིན་པར་ཐལ། གཟུགས་ཀྱི་སྐྱེ་མཆེད་ནས་རེག་བྱའི་སྐྱེ་མཆེད་ཀྱི་བར་ལྔ་པོ་གང་རུང་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། གཟུགས་ཀྱི་སྐྱེ་མཆེད་ནས་རེག་བྱའི་སྐྱེ་མཆེད་ཀྱི་བར་ལྔ་དང་ཤེས་པ་དང་དྲུག་པོ་གང་རུང་ཡིན་ན་རང་ཉིད་ཚད་མས་ངེས་པ་རང་གི་ངོ་བོར་མ་གྱུར་བའི་ཆོས་གཞན་ཚད་མས་ངེས་པ་ལ་ལྟོས་མི་དགོས་པས་ཁྱབ་པ་ཡིན་པའི་ཕྱིར།
ཁ་ཅིག་ན་རེ། བཏགས་ཡོད་གསུམ་པོ་གང་རུང་ཡིན་ན་བཏགས་ཡོད་ཡིན་པས་ཁྱབ་ཟེར་ན། རི་བོང་རྭ་ཆོས་ཅན། བཏགས་ཡོད་ཡིན་པར་ཐལ། བཏགས་ཡོད་གསུམ་པོ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། རི་བོང་རྭ་ཆོས་ཅན། བཏགས་ཡོད་གསུམ་པོ་གང་རུང་ཡིན་པར་ཐལ། ཀུན་བཏགས་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཀུན་བཏགས་ཡིན་པར་ཐལ། མཚན་ཉིད་ཡོངས་ཆད་ཀྱི་ཀུན་བཏགས་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། མཚན་ཉིད་ཡོངས་ཆད་ཀྱི་ཀུན་བཏགས་ཡིན་པར་ཐལ། མེད་རྒྱུའི་ཀུན་བཏགས་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། མེད་རྒྱུའི་ཀུན་བཏགས་ཡིན་པར་ཐལ། མེད་པ་ཡིན་པའི་ཕྱིར། རྩ་བར་འདོད་ན། རི་བོང་ར་ཆོས་ཅན། བཏགས་ཡོད་མ་ཡིན་པར་ཐལ། རྟོགས་པས་བཏགས་ཙམ་གྱི་ཆོས་མ་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅ། རྟོག་པས་བཏགས་ཙམ་གྱི་ཆོས་མ་ཡིན་པར་ཐལ། ཆོས་མ་ཡིན་པའི་ཕྱིར།
གཞན་ཡང་། དངོས་པོ་ཆོས་ཅན། བཏགས་ཡོད་ཡིན་པར་ཐལ། བཏགས་ཡོད་གསུམ་པོ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། དངོས་པོ་ཆོས་ཅན། བཏགས་ཡོད་གསུམ་པོ་གང་རུང་ཡིན་པར་ཐལ། ལྡན་མིན་འདུ་བྱེད་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བཏགས་ཡོད་གསུམ་པོ་འདྲེན་པའི་ཚེ་ན། ཀུན་བཏགས་དང་ལྡན་མིན་འདུ་བྱེད་དང་ཡོངས་གྲུབ་གསུམ་པོ་དེ་འདྲེན་དགོས་པའི་ཕྱིར། རྩ་བར་འདོད་ན། དངོས་པོ་ཆོས་ཅན༑ བཏགས་ཡོད་མ་ཡིན་པར་ཐལ། རྫས་ཡོད་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། རྫས་ཡོད་ཡིན་པར་ཐལ། རྫས་ཆོས་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། རྫས་ཆོས་ཡིན་པར་ཐལ། རྫས་ཡིན་པ་གང་ཞིག ། ཆོས་ཡིན་པའི་ཕྱིར༑ རྟགས་རེ་རེ་ནས་སླ།
ཁ་ཅིག་ན་རེ། འདུས་མ་བྱས་ཀྱི་ནམ་མཁའ་ཆོས་ཅན། རྫས་ཡོད་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། དངོས་པོ་ཡིན་པར་ཐལ། གཞན་དབང་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། གཞན་དབང་ཡིན་པར་ཐལ། འདུས་མ་བྱས་ཀྱི་ནམ་མཁའི་སྟེང་གི་གཞན་དབང་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། ཁྱོད་ཁྱོད་ཀྱི་སྟེང་གི་གཞན་དབང་ཡིན་པར་ཐལ། ཁྱོད་གཞི་གྲུབ་པའི་ཕྱིར། །
རང་གི་ལུགས་ལ། རྫས་ཆོས་ཀྱི་མཚན་ཉིད་ཡོད་དེ། རྟོག་པས་བཏགས་ཙམ་མ་ཡིན་པར་ཡུལ་རང་གི་ངོས་ནས་གྲུབ་པའི་དོན་དམ་པར་དོན་བྱེད་ནུས་པའི་དངོས་པོ་དེ་ཡིན་པའི་ཕྱིར། རྫས་ཆོས་དང་རྫས་ཡོད་དང་དངོས་པོ་གསུམ་དོན་གཅིག ། མཚན་གཞི་ནི་ཡོད་དེ། གཟུགས་དེ་ཡིན་པའི་ཕྱིར། གཟུགས་ཆོས་ཅན། ཁྱོད་ལ་རྫས་ཆོས་ཞེས་བརྗོད་པའི་རྒྱུ་མཚན་ཡོད་དེ། རྫས་ཡང་ཡིན། ཆོས་ཡང་ཡིན་པའི་གཞི་མཐུན་པ་ཡིན་པས་ན། དེ་ལྟར་དུ་བརྗོད་པ་ཡིན་པའི་ཕྱིར། གཟུགས་ཆོས་ཅན། ཁྱོད་ཡ་རྫས་ཡོད་ཅེས་བརྗོད་པའི་རྒྱུ་མཚན་ཡོད་དེ། རྫས་དུ་ཡོད་པས་ན། དེ་ལྟར་དུ་བརྗོད་པ་ཡིན་པའི་ཕྱིར། རྫས་ཡོད་ལ་སྒྲའི་བརྗོད་རིགས་ཀྱི་སྒོ་ནས་དབྱེ་ན་བཞི་ཡོད་དེ། རིགས་པས་གྲུབ་པའི་རྫས་ཡོད་དང་། བརྟན་པ་མི་འགྱུར་བའི་རྫས་ཡོད་དང་། དོན་བྱེད་ནུས་པའི་རྫས་ཡོད་དང་། རང་རྒྱ་འཛིན་ཐུབ་པའི་རྫས་ཡོད་དང་བཞི་ཡོད་པའི་ཕྱིར། རིགས་པས་གྲུབ་པའི་རྫས་ཡོད་དང་ཡོད་པ་གཉིས་དོན་གཅིག ། བརྟན་པ་མི་འགྱུར་བའི་རྫས་ཡོད་དང་། རྟག་པ་གཉིས་དོན་གཅིག ། དོན་བྱེད་ནུས་པའི་རྫས་ཡོད་དང་དངོས་པོ་གཉིས་དོན་གཅིག ། རང་རྒྱ་འཛིན་ཐུབ་པའི་རྫས་ཡོད་ཀྱི་མཚན་ཉིད་ཡོད་དེ། རང་ཉིད་ཚད་མས་ངེས་པ་རང་གི་ངོ་བོར་མ་གྱུར་བའི་ཆོས་གཞན་ཚད་མས་ངེས་པ་ལ་ལྟོས་མི་དགོས་པའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། ཕྱིའི་སྐྱེ་མཆེད་ལྔ་དང་ཤེས་པ་ཐམས་ཅད་པོ་དེ་ཡིན་པའི་ཕྱིར། བཏགས་ཡོད་ཀྱི་མཚན་ཉིད་ཡོད་དེ། ཡུལ་རང་གི་ངོས་ནས་གྲུབ་པའི་གནས་ལུགས་ཀྱི་ངོ་བོ་མ་ཡིན་པར་རྟོག་པས་བཏགས་ཙམ་དུ་གྲུབ་པའི་ཆོས་དེ་ཡིན་པའི་ཕྱིར། བཏགས་ཡོད་དང་ལྡོག་ཆོས་དང་རྟག་པ་གསུམ་དོན་གཅིག ། བཏགས་ཡོད་ལ་སྒྲའི་བརྗོད་རིགས་ཀྱི་སྒོ་ནས་དབྱེ་ན་གསུམ་ཡོད་དེ། ཀུན་བཏགས་དང་། ལྡན་མིན་འདུ་བྱེད་དང་། ཡོངས་གྲུབ་དང་གསུམ་ཡོད་པའི་ཕྱིར། །
དེ་ལ་རྩོད་པ་སྤོང་བ་ལ། ཁ་ཅིག་ན་རེ། སྒྲ་མི་རྟག་པ་ཆོས་ཅན། བཏགས་ཡོད་ཡིན་པར་ཐལ། ལྡོག་ཆོས་ཡིན་པའི་ཕྱིར། མ་གྲུབ་ན། སྒྲ་མི་རྟག་པ་ཆོས་ཅན། ལྡོག་ཆོས་ཡིན་པར་ཐལ། ལྡོག་པ་ཡང་ཡིན། ཆོས་ཡང་ཡིན་པའི་གཞི་མཐུན་པ་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། སྒྲ་མི་རྟག་པ་ཆོས་ཅན། ལྡོག་པ་ཡང་ཡིན། ཆོས་ཡང་ཡིན་པའི་གཞི་མཐུན་པ་ཡིན་པར་ཐལ། ལྡོག་པ་ཡིན་པ་གང་ཞིག ། ཆོས་ཡིན་པའི་ཕྱིར། རྟགས་དང་པོ་མ་གྲུབ་ན། སྒྲ་མི་རྟག་པ་ཆོས་ཅན། ལྡོག་པ་ཡིན་པར་ཐལ། དགག་པ་ཡིན་པའི་ཕྱིར། མ་གྲུབ་ན། སྒྲ་མི་རྟག་པ་ཆོས་ཅན། དགག་པ་ཡིན་པར་ཐལ། མ་ཡིན་དགག་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། ཁྱོད་མི་རྟག་པ་མ་ཡིན་དགག་ཡིན་པར་ཐལ། ཁྱོད་མི་རྟག་པ་ཡིན་པའི་ཕྱིར། རྟགས་གཉིས་པ་མ་གྲུབ་ན། སྒྲ་མི་རྟག་པ་ཆོས་ཅན། ཆོས་ཡིན་པར་ཐལ། གཞི་གྲུབ་པའི་ཕྱིར། གོང་དུ་འདོད་ན། སྒྲ་མི་རྟག་པ་ཆོས་ཅན། བཏགས་ཡོད་མ་ཡིན་པར་ཐལ། དངོས་པོ་ཡིན་པའི་ཕྱིར། ཁ་ཅིག་ན་རེ། ལྡོག་པ་ཡང་ཡིན་ཆོས་ཡང་ཡིན་པའི་གཞི་མཐུན་པ་ཡིན་ན་ལྡོག་ཆོས་ཡིན་དགོས་པར་ཐལ། རྫས་ཡང་ཡིན། ཆོས་ཡང་ཡིན་པའི་གཞི་མཐུན་པ་ཡིན་ན་རྫས་ཆོས་ཡིན་དགོས་པའི་ཕྱིར་ཟེར་ན་མ་ཁྱབ། དེ་གཉིས་མི་འདྲ་བ་ཡིན་པའི་ཕྱིར།
ཁ་ཅིག་ན་རེ། འདུས་མ་བྱས་ཀྱི་ནམ་མཁའ་ཆོས་ཅན། རིགས་པས་གྲུབ་པའི་རྫས་ཡོད་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས་འདོད་ན། འདུས་མ་བྱས་ཀྱི་ནམ་མཁའ་ཆོས་ཅན། རིགས་པས་གྲུབ་པའི་རྫས་ཡོད་མ་ཡིན་པར་ཐལ། རིགས་པས་གྲུབ་པའི་བཏགས་ཡོད་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། རིགས་པས་གྲུབ་པའི་བཏགས་ཡོད་ཡིན་པར་ཐལ། ཚད་མས་གྲུབ་པའི་བཏགས་ཡོད་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། ཚད་མས་གྲུབ་པའི་བཏགས་ཡོད་ཡིན་པར་ཐལ། བཏགས་ཡོད་ཡིན་པའི་ཕྱིར།
ཁ་ཅིག་ན་རེ། རྟག་པ་ཆོས་ཅན། བརྟན་པ་མི་འགྱུར་བའི་རྫས་ཡོད་མ་ཡིན་པར་ཐལ། བརྟན་པ་མི་འགྱུར་བའི་བཏགས་ཡོད་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། བརྟན་པ་མི་འགྱུར་བའི་བཏགས་ཡོད་ཡིན་པར་ཐལ། བརྟན་པ་མི་འགྱུར་བ་གང་ཞིག ། བཏགས་ཡོད་ཡིན་པའི་ཕྱིར་ཟེར་ན་མ་ཁྱབ། རྟགས་དང་པོ་མ་གྲུབ་ན། རྟག་པ་ཆོས་ཅན། བརྟན་པ་མི་འགྱུར་བ་ཡིན་པར་ཐལ། བརྟན་པ་མི་འཇིག་པ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། བརྟན་པ་མི་འཇིག་པ་ཡིན་པར་ཐལ། བརྟན་པ་རྟག་པ་ཡིན་པའི་ཕྱིར། རྟགས་གཉིས་པ་མ་གྲུབ་ན། རྟག་པ་ཆོས་ཅན། བཏགས་ཡོད་ཡིན་པར་ཐལ། རྟག་པ་ཡིན་པའི་ཕྱིར། །
རྩོམ་སྒྲིག་པ། བློ་བཟང་བཀྲ་ཤིས།