བསེ་བསྡུས་ལསཁྱབ་པ་སྒོ་བརྒྱད་ཀྱི་རྣམ་བཞག་
ཁྱབ་པ་སྒོ་བརྒྱད་ཀྱི་རྣམ་བཞག་བཤད་པ་ལ།
ཁ་ཅིག་ན་རེ། ཐལ་འགྱུར་དེའི་རྗེས་ཁྱབ་རྣལ་མ་ངེས་ན། ཐལ་འགྱུར་དེའི་འགལ་ཁྱབ་རྣལ་མ་ངེས་པས་ཁྱབ་ཟེར་ན། ཤེས་བྱ་ཆོས་ཅན། ཀྭ་བུམ་གཉིས་ཡིན་པར་ཐལ། རྟག་དངོས་གཉིས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་འགལ་ཁྱབ་རྩལ་མ་མ་ངེས་པར་ཐལ། ཁྱོད་ཀྱི་རྗེས་ཁྱབ་རྣལ་མ་ངེས་པའི་ཕྱིར། ཁྱབ་པ་ཁས། མ་གྲུབ་ན། ཤེས་བྱ་ཆོས་ཅན། ཀྭ་བུམ་གཉིས་ཡིན་པར་ཐལ། རྟག་དངོས་གཉིས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་རྗེས་ཁྱབ་རྣལ་མ་ངེས་པར་ཐལ། ཁྱོད་ཀྱི་རྗེས་ཁྱབ་གློང་བའི་ཚེ་ན། རྟག་དངོས་གཉིས་ཡིན་ན། ཀྭ་བུམ་གཉིས་ཡིན་པས་ཁྱབ་པ་གློང་རིགས་པ་གང་ཞིག ། རྟག་དངོས་གཉིས་ཡིན་ན། ཀྭ་བུམ་གཉིས་ཡིན་པས་ཁྱབ་པའི་ཕྱིར། རྟགས་དང་པོ་མ་གྲུབ་ན། ཤེས་བྱ་ཆོས་ཅན། ཀྭ་བུམ་གཉིས་ཡིན་པར་ཐལ། རྟག་དངོས་གཉིས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་རྗེས་ཁྱབ་གློང་བའི་ཚེ་ན། རྟག་དངོས་གཉིས་ཡིན་ན། ཀྭ་བུམ་གཉིས་ཡིན་པས་ཁྱབ་པ་གློང་རིགས་པར་ཐལ། ཁྱོད་ཀྭ་བུམ་གཉིས་ཀྱིས་གསལ་བ། རྟག་དངོས་གཉིས་ཀྱིས་རྟགས་བྱས་པའི་རྟགས་གསལ་གཉིས་ཀ་དང་ལྡན་པའི་ཐལ་འགྱུར་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཐལ་འགྱུར་གང་དང་གང་གི་རྗེས་ཁྱབ་གློང་བའི་ཚེ་ན་རྟགས་དེ་ཡིན་ན་གསལ་བ་དེ་ཡིན་པས་ཁྱབ་པ་ཀློང་རིགས་པ་ཡིན་པའི་ཕྱིར། རྩ་བར་འདོད་ན། ཤེས་བྱ་ཆོས་ཅན། ཀྭ་བུམ་གཉིས་ཡིན་པར་ཐལ། རྟག་དངོས་གཉིས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་འགལ་ཁྱབ་རྣལ་མ་ངེས་པར་ཐལ། ཁྱོད་ཀྱི་འགལ་ཁྱབ་ཀློང་བའི་ཚེ་ན། རྟག་དངོས་གཉིས་ཡིན་ན་ཀྭ་བུམ་གཉིས་མ་ཡིན་པས་ཁྱབ་པ་ཀློང་རིགས་པ་གང་ཞིག ། རྟག་དངོས་གཉིས་ཡིན་ན་ཀྭ་བུམ་གཉིས་མ་ཡིན་པས་ཁྱབ་པའི་ཕྱིར།
ཁ་ཅིག་ན་རེ། ཐལ་འགྱུར་དེའི་རྗེས་ཁྱབ་རྣལ་མ་ངེས་ན། ཐལ་འགྱུར་དེའི་ལྡོག་ཁྱབ་རྣལ་མ་ངེས་པས་ཁྱབ་ཟེར་ན། རྟག་པ་ཡིན་པར་ཐལ། ཡོད་པ་གང་ཞིག ། དངོས་པོ་མ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ལྡོག་ཁྱབ་རྣལ་མ་ངེས་པར་ཐལ། ཁྱོད་ཀྱི་རྗེས་ཁྱབ་རྣལ་མ་ངེས་པའི་ཕྱིར། ཁྱབ་པ་ཁས། མ་གྲུབ་ན། རྟག་པ་ཡིན་པར་ཐལ། ཡོད་པ་གང་ཞིག ། དངོས་པོ་མ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་རྗེས་ཁྱབ་རྣལ་མ་ངེས་པར་ཐལ། ཁྱོད་ཀྱི་རྗེས་ཁྱབ་ཀློང་བའི་ཚེ་ན་ཡོད་པ་གང་ཞིག ། དངོས་པོ་མ་ཡིན་ན། རྟག་པ་ཡིན་པས་ཁྱབ་པ་ཀློང་རིགས་པ་གང་ཞིག ། ཡོད་པ་གང་ཞིག ། དངོས་པོ་མ་ཡིན་ན། རྟག་པ་ཡིན་པས་ཁྱབ་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། ཡོད་པ་གང་ཞིག ། དངོས་པོ་མ་ཡིན་ན། རྟག་པ་ཡིན་པས་ཁྱབ་པར་ཐལ། ཡོད་པ་ལ་རྟག་དངོས་གཉིས་སུ་གྲངས་ངེས་ཤིང་དེ་གཉིས་གང་རུང་མ་ཡིན་པའི་ཕུང་གསུམ་མི་སྲིད་པ་ཡིན་པའི་ཕྱིར། དེར་ཐལ། ཡོད་པ་ཡིན་ན། རྟག་དངོས་གང་རུང་ཡིན་པས་ཁྱབ་པའི་ཕྱིར། རྩ་བར་འདོད་ན། རྟག་པ་ཡིན་པར་ཐལ། ཡོད་པ་གང་ཞིག ། དངོས་པོ་མ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ལྡོག་ཁྱབ་རྣལ་མ་མ་ངེས་པར་ཐལ། ཁྱོད་ཀྱི་ལྡོག་ཁྱབ་ཀློང་བའི་ཚེ་ན། རྟག་པ་མ་ཡིན་ན། ཡོད་པ་གང་ཞིག ། དངོས་པོ་མ་ཡིན་པ་མ་ཡིན་པས་ཁྱབ་པ་ཀློང་རིགས་པ་གང་ཞིག ། རྟག་པ་མ་ཡིན་ན་ཡོད་པ་གང་ཞིག ། དངོས་པོ་མ་ཡིན་པ་མ་ཡིན་པས་མ་ཁྱབ་པའི་ཕྱིར། རྟགས་དང་པོ་མ་གྲུབ་ན། རྟག་པ་ཡིན་པར་ཐལ། ཡོད་པ་གང་ཞིག ། དངོས་པོ་མ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ལྡོག་ཁྱབ་ཀློང་བའི་ཚེ་ན་རྟག་པ་མ་ཡིན་ན་ཡོད་པ་གང་ཞིག ། དངོས་པོ་མ་ཡིན་པ་མ་ཡིན་པས་ཁྱབ་པ་ཀློང་རིགས་པར་ཐལ། ཁྱོད་རྟག་པས་གསལ་བ་ཡོད་པ་གང་ཞིག ། དངོས་པོ་མ་ཡིན་པས་རྟགས་བྱས་པའི་ཐལ་འགྱོར་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཐལ་འགྱུར་གང་དང་གང་གི་ལྡོག་ཁྱབ་ཀློང་བའི་ཚེ་ན་གསལ་བ་དེ་མ་ཡིན་ན། རྟགས་དེ་མ་ཡིན་པས་ཁྱབ་པ་ཀློང་དགོས་པའི་ཕྱིར། རྟགས་གཉིས་པ་མ་གྲུབ་ན། རི་བོང་རྭ་ཆོས་ཅན། ཡོད་པ་གང་ཞིག ། དངོས་པོ་མ་ཡིན་པ་མ་ཡིན་པར་ཐལ། རྟག་པ་མ་ཡིན་པའི་ཕྱིར། ཁྱབ་པ་ཁས། འདོད་ན། རི་བོང་རྭ་ཆོས་ཅན། ཡོད་པ་གང་ཞིག ། དངོས་པོ་ཡིན་པར་ཐལ། ཡོད་པ་གང་ཞིག ། དངོས་པོ་མ་ཡིན་པ་མ་ཡིན་པའི་ཕྱིར། རྟགས་ཁས། འདོད་ན། རི་བོང་རྭ་ཆོས་ཅན། ཡོད་པ་དང་དངོས་པོ་གཉིས་ཀ་ཡིན་པར་ཐལ། ཡོད་པ་གང་ཞིག ། དངོས་པོ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། མེད་པ་ཡིན་པའི་ཕྱིར།
ཁ་ཅིག་ན་རེ། ཐལ་འགྱུར་དེའི་ཐུར་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་ན་ཐལ་འགྱུར་དེའི་ཐུར་ཁྱབ་རྣལ་མ་ངེས་པ་ཁྱབ་ཟེར་ན། སྒྲ་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་ངེས་པར་ཐལ། ཁྱོད་ཀྱི་ཐུར་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་པའི་ཕྱིར། ཁྱབ་པ་ཁས། མ་གྲུབ་ན། སྒྲ་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་པར་ཐལ། ཁྱོད་ཀྱི་ཐུར་ཁྱབ་ཀློང་པའི་ཚེ་ན་དངོས་པོ་ཡིན་ན་གཟུགས་ཡིན་པས་ཁྱབ་པ། གཟུགས་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་ཐུར་ཁྱབ་ཀོང་བའི་ཚེ་ན་གཟུགས་ཡིན་ན་དངོས་པོ་ཡིན་པས་ཁྱབ་པ་ཀློང་རིགས་པ་གང་ཞིག ། གཟུགས་ཡིན་ན་དངོས་པོ་ཡིན་པས་ཁྱབ་པའི་ཕྱིར། རྩ་བར་འདོད་ན། སྒྲ་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་མ་ངེས་པར་ཐལ། ཁྱོད་ཀྱི་ཐུར་ཁྱབ་ཀློང་བའི་ཚེ་ན། དངོས་པོ་ཡིན་ན་གཟུགས་ཡིན་པས་ཁྱབ་པ་ཀློང་རིགས་པ་གང་ཞིག ། དངོས་པོ་ཡིན་ན་གཟུགས་ཡིན་པས་མ་ཁྱབ་པའི་ཕྱིར། རྟགས་དང་པོ་མ་གྲུབ་ན། སྒྲ་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་ཀློང་བའི་ཚེ་ན་དངོས་པོ་ཡིན་ན་གཟུགས་ཡིན་པས་ཁྱབ་པ་ཀློང་རིགས་པར་ཐལ། ཁྱོད་དངོས་པོས་གསལ་བ་དང་གཟུགས་ཀྱིས་རྟགས་བྱས་པའི་རྟགས་གསལ་གཉིས་ཀ་དང་ལྡན་པའི་ཐལ་འགྱུར་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རྟགས་གསལ་གཉིས་ཀ་དང་ལྡན་པའི་ཐལ་འགྱུར་གང་དང་གང་གི་ཐུར་ཁྱབ་ཀློང་བའི་ཚེ་ན་གསལ་བ་དེ་ཡིན་ན། རྟགས་དེ་ཡིན་པས་ཁྱབ་པ་ཀློང་དགོས་པའི་ཕྱིར།
ཁ་ཅིག་ན་རེ། ཐལ་འགྱུར་དེའི་འགལ་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་ན་ཐལ་འགྱུར་དེའི་ཐུར་ཁྱབ་རྣལ་མ་ངེས་པས་ཁྱབ་ཟེར་ན། མེད་པ་ཡིན་པར་ཐལ། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་ངེས་པར་ཐལ། ཁྱོད་ཀྱི་འགལ་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་པའི་ཕྱིར༑ ཁྱབ་པ་ཁས། མ་གྲུབ་ན། མེད་པ་ཡིན་པར་ཐལ། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་འགལ་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་པར་ཐལ། ཁྱོད་ཀྱི་འགལ་ཁྱབ་ཀློང་བའི་ཚེ་ན་ཡོད་པ་ཡིན་ན་མེད་པ་མ་ཡིན་པས་ཁྱབ་པ། མེད་པ་མ་ཡིན་པར་ཐལ། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་ཐུར་ཁྱབ་ཀློང་བའི་ཚེ་ན་མེད་པ་མ་ཡིན་ན་ཡོད་པ་ཡིན་པས་ཁྱབ་པ་ཀློང་རིགས་པ་གང་ཞིག ། མེད་པ་མ་ཡིན་ན་ཡོད་པ་ཡིན་པས་ཁྱབ་པའི་ཕྱིར། རྩ་བར་འདོད་ན། མེད་པ་ཡིན་པར་ཐལ། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་མ་ངེས་པར་ཐལ། ཁྱོད་ཀྱི་ཐུར་ཁྱབ་ཀློང་བའི་ཚེ་ན་མེད་པ་ཡིན་ན་ཡོད་པ་ཡིན་པ་ཁྱབ་པ་ཀློང་རིགས་པ་གང་ཞིག ། མེད་པ་ཡིན་ན་ཡོད་པ་ཡིན་པས་མ་ཁྱབ་པའི་ཕྱིར། །
རྩོམ་སྒྲིག་པ། བློ་བཟང་བཀྲ་ཤིས།