བསེ་བསྡུས་ལས་རང་མཚན་དང་སྤྱི་མཚན་གྱི་རྣམ་བཞག
རང་མཚན་དང་སྤྱི་མཚན་གྱི་རྣམ་བཞག་བཤད་པ་ལ།
ཁ་ཅིག་ན་རེ། གཞི་གྲུབ་ན། རང་མཚན་ཡིན་པས་ཁྱབ་ཟེར་ན། འདུས་མ་བྱས་ཀྱི་ནམ་མཁའ་ཆོས་ཅན། རང་མཚན་ཡིན་པར་ཐལ། གཞི་གྲུབ་པའི་ཕྱིར། གཞི་གྲུབ་པའི་ཕྱིར། ཁྱབ་པ་ཁས། འདོད་ན། འདུས་མ་བྱས་ཀྱི་ནམ་མཁའ་ཆོས་ཅན། རང་གི་མཚན་ཉིད་ཀྱིས་གྲུབ་པར་ཐལ། རང་མཚན་ཡིན་པའི་ཕྱིར། འདོད་ན། འདུས་མ་བྱས་ཀྱི་ནམ་མཁའ་ཆོས་ཅན། རང་གི་མཚན་ཉིད་ཀྱིས་མ་གྲུབ་པར་ཐལ། རྟོག་པས་བཏགས་ཙམ་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། རྟོག་པས་བཏགས་ཙམ་ཡིན་པར་ཐལ། འདུས་མ་བྱས་ཀྱི་ཆོས་ཡིན་པའི་ཕྱིར། གཞན་ཡང་། འདུས་མ་བྱས་ཀྱི་ནམ་མཁའ་ཆོས་ཅན། དོན་དམ་བདེན་པ་ཡིན་པར་ཐལ། རང་མཚན་ཡིན་པའི་ཕྱིར། འདོད་ན། འདུས་མ་བྱས་ཀྱི་ནམ་མཁའ་ཆོས་ཅན། བློ་དོན་དམ་པ་མངོན་སུམ་གྱི་ཚད་མའི་དངོས་གཞལ་ཡིན་པར་ཐལ། དོན་དམ་བདེན་པ་ཡིན་པའི་ཕྱིར། འདོད་ན། འདུས་མ་བྱས་ཀྱི་ནམ་མཁའ་ཆོས་ཅན། མངོན་སུམ་གྱི་ཚད་མའི་དངོས་གཞལ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། སྤྱི་མཚན་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། མངོན་སུམ་གྱི་ཚད་མའི་དངོས་གཞལ་དང་རང་མཚན་དང་དངོས་པོ་རྣམས་དོན་གཅིག་ཡིན་པའི་ཕྱིར།
ཁ་ཅིག་ན་རེ། རྟོག་པས་བཏགས་ཙམ་ཡིན་ན། སྤྱི་མཚན་ཡིན་པས་ཁྱབ་ཟེར་ན། རི་བོང་རྭ་ཆོས་ཅན། སྤྱི་མཚན་ཡིན་པར་ཐལ། རྟོག་པས་བཏགས་ཙམ་ཡིན་པའི་ཕྱིར། ཁྱབ་པ་ཁས། འདོད་ན། རི་བོང་རྭ་ཆོས་ཅན། ཡོད་པར་ཐལ། སྤྱི་མཚན་ཡིན་པའི་ཕྱིར། འདོད་མི་ནུས་ཏེ། མེད་པ་ཡིན་པའི་ཕྱིར།
ཁ་ཅིག་ན་རེ། ཡུལ་དུས་རང་བཞིན་མ་འདྲེས་པའི་ཆོས་ཡིན་ན། རང་མཚན་ཡིན་པས་ཁྱབ་ཟེར་ན། ཤེས་བྱ་ཆོས་ཅན། རང་མཚན་ཡིན་པར་ཐལ། ཡུལ་དུས་རང་བཞིན་མ་འདྲེས་པའི་ཆོས་ཡིན་པའི་ཕྱིར། དེར་ཐལ། གཞི་གྲུབ་པའི་ཕྱིར། རྩ་བར་འདོད་ན། ཤེས་བྱ་ཆོས་ཅན། རང་མཚན་མ་ཡིན་པར་ཐལ། དོན་དམ་བདེན་པ་མ་ཡིན་པའི་ཕྱིར། མ་གྲུབ་ན། ཤེས་བྱ་ཆོས་ཅན། དོན་དམ་བདེན་པ་མ་ཡིན་པར་ཐལ། ཀུན་རྫོབ་བདེན་པ་ཡིན་པའི་ཕྱིར། མ་གྲུབ་ན། ཤེས་བྱ་ཆོས་ཅན། ཀུན་རྫོབ་བདེན་པ་ཡིན་པར་ཐལ། སྤྱི་མཚན་ཡིན་པའི་ཕྱིར།
ཁ་ཅིག་ན་རེ། རིགས་པ་དང་རྒྱུན་གང་རུང་ཡིན་ན། རང་མཚན་མ་ཡིན་པས་ཁྱབ་ཟེར་ན། བུམ་པ་ཆོས་ཅན། རང་མཚན་མ་ཡིན་པར་ཐལ། རིགས་པ་དང་རྒྱུན་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པ་ཆོས་ཅན། རིགས་པ་དང་རྒྱུན་གང་རུང་ཡིན་པར་ཐལ། རིགས་པ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། རིགས་པ་ཡིན་པར་ཐལ། བསགས་རྡུལ་ཕྲ་རབ་དུ་མ་འདུས་པའི་གོང་བུ་ཡིན་པའི་ཕྱིར། རྩ་བར་འདོད་ན། བུམ་པ་ཆོས་ཅན། རང་མཚན་ཡིན་པར་ཐལ། དངོས་པོ་ཡིན་པའི་ཕྱིར།
གཞན་ཡང་། ཤེས་པ་ཆོས་ཅན། རང་མཚན་མ་ཡིན་པར་ཐལ། རྒྱུན་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཤེས་པ་ཆོས་ཅན། རྒྱུན་ཡིན་པར་ཐལ། སྐད་ཅིག་སྔ་ཕྱི་མང་པོ་འཚོགས་པའི་རྒྱུན་ཡིན་པའི་ཕྱིར། མ་གྲུབ་ན། ཤེས་པ་ཆོས་ཅན། སྐད་ཅིག་སྔ་ཕྱི་མང་པོ་འཚོགས་པའི་རྒྱུན་ཡིན་པར་ཐལ། ཤེས་པ་དང་གཅིག་ཡིན་པའི་ཕྱིར། རྩ་བར་འདོད་ན། ཤེས་པ་ཆོས་ཅན། རང་མཚན་ཡིན་པར་ཐལ། དོན་དམ་བདེན་པ་ཡིན་པའི་ཕྱིར། མ་གྲུབ་ན། ཤེས་པ་ཆོས་ཅན། དོན་དམ་བདེན་པ་ཡིན་པར་ཐལ། མངོན་སུམ་གྱི་ཚད་མའི་དངོས་གཞལ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དོན་དམ་བདེན་པ་དང་རང་མཚན་དང་མངོན་སུམ་གྱི་ཚད་མའི་དངོས་གཞལ་རྣམས་དོན་གཅིག་ཡིན་པའི་ཕྱིར།
ཁ་ཅིག་ན་རེ། ཡུལ་དུས་རང་བཞིན་མ་འདྲེས་པའི་ཆོས་དེ་རང་མཚན་གྱི་མཚན་ཉིད་ཡིན་ལ། ཡུལ་དུས་རང་བཞིན་མ་འདྲེས་པའི་དོན་ནི་ཤར་ན་ཡོད་ན་ནུབ་ན་མེད་པས་ཁྱབ་པ་ལྟ་བུ་ཡུལ་མ་འདྲེས་པའི་དོན་དང་། ཁ་སང་གི་དུས་སུ་ཡོད་ན་དེ་རིང་གི་དུས་སུ་མེད་པས་ཁྱབ་པ་ལྟ་བུ་དུས་མ་འདྲེས་པའི་དོན་དང་། བུམ་པ་ལ་རྗེས་སུ་སོང་ན་ཀྭ་བ་ལ་རྗེས་སུ་མ་སོང་བས་ཁྱབ་པ་ལྟ་བུ་རང་བཞིན་མ་འདྲེས་པའི་དོན་ཡིན་ཟེར་ན། དང་པོ་ལ་འོ་ན། ཤར་ན་ཡོད་ན། ནུབ་ན་མེད་པས་ཁྱབ་པ་ཡོད་པར་ཐལ། དེ་ཡུལ་མ་འདྲེས་པའི་དོན་ཡིན་པའི་ཕྱིར། རྟགས་ཁས། འདོད་ན། ཤེས་བྱ་ཆོས་ཅན། ནུབ་ན་མེད་པར་ཐལ། ཤར་ན་ཡོད་པའི་ཕྱིར། ཁྱབ་པ་ཁས། མ་གྲུབ་ན། ཤེས་བྱ་ཆོས་ཅན། ཤར་ན་ཡོད་པར་ཐལ། ཤར་ཁྱོད་ཀྱི་དགག་གཞི་མ་ཡིན་པའི་ཕྱིར། རྩ་བར་འདོད་མི་ནུས་ཏེ། ནུབ་ན་ཡང་ཡོད་པའི་ཕྱིར། མ་གྲུབ་ན། ཤེས་བྱ་ཆོས་ཅན། ནུབ་ན་ཡོད་པར་ཐལ། ནུབ་ཁྱོད་ཀྱི་དགག་གཞི་མ་ཡིན་པའི་ཕྱིར།
གཉིས་པ་ལ། འོ་ན། ཁྱོད་རང་ལ། བུམ་པ་ལ་རྗེས་སུ་སོང་ན། ཀྭ་བ་ལ་རྗེས་སུ་མ་སོང་བས་ཁྱབ་པ་དང་ཀྭ་བ་ལ་རྗེས་སུ་སོང་ན། བུམ་པ་ལ་རྗེས་སུ་མ་སོང་བས་ཁྱབ་པ་ལ་གཉིས་ཀ་རེ་རེ་ནས་ཡོད་པར་ཐལ། དེ་རང་བཞིན་མ་འདྲེས་པའི་དོན་ཡིན་པའི་ཕྱིར། རྟགས་ཁས། འདོད་ན། དངོས་པོ་ཆོས་ཅན། ཀྭ་བ་ལ་རྗེས་སུ་མ་སོང་བར་ཐལ། བུམ་པ་ལ་རྗེས་སུ་སོང་བའི་ཕྱིར། ཁྱབ་པ་ཁས། མ་གྲུབ་ན། དངོས་པོ་ཆོས་ཅན། བུམ་པ་ལ་རྗེས་སུ་སོང་བར་ཐལ། བུམ་པའི་སྤྱི་ཡིན་པའི་ཕྱིར། རྩ་བར་འདོད་མི་ནུས་ཏེ། ཀྭ་བ་ལ་རྗེས་སུ་སོང་བའི་ཕྱིར། མ་གྲུབ་ན། དངོས་པོ་ཆོས་ཅན། ཀྭ་བ་ལ་རྗེས་སུ་སོང་བར་ཐལ། ཀྭ་བའི་སྤྱི་ཡིན་པའི་ཕྱིར།
གསུམ་པ་ལ། འོ་ན། ཁ་སང་གི་དུས་སུ་ཡོད་ན། དེ་རིང་ས་དུས་སུ་མེད་པས་ཁྱབ་པ་ཡོད་པར་ཐལ། དེ་དུས་མ་འདྲེས་པའི་དོན་ཡིན་པའི་ཕྱིར། རྟགས་ཁས། འདོད་ན་རྟག་པ་ཆོས་ཅན། དེ་རིང་གི་དུས་སུ་མེད་པར་ཐལ། ཁ་སང་གི་དུས་སུ་ཡོད་པའི་ཕྱིར། རྟགས་ཁྱབ་ཁས། འདོད་མི་ནུས་ཏེ། དེ་རིང་གི་དུས་སུ་ཡོད་པའི་ཕྱིར། དེར་ཐལ། རྟག་པ་དང་གཅིག་ཡིན་པའི་ཕྱིར།
ཁ་ཅིག་ན་རེ། ཤེས་བྱ་འཛིན་པའི་རྟོག་པ་ཆོས་ཅན། སྤྱི་མཚན་ཡིན་པར་ཐལ། ཀུན་རྫོབ་བདེན་པ་ཡིན་པའི་ཕྱིར། མ་གྲུབ་ན། ཤེས་བྱ་འཛིན་པའི་རྟོག་པའི་རྟོག་པ་ཆོས་ཅན། ཀུན་རྫོབ་བདེན་པ་ཡིན་པར་ཐལ། ཀུན་རྫོབ་བདེན་པ་ཞེས་པའི་ཚིག་ཟུར་གྱི་ཀུན་རྫོབ་དེ་ཡིན་པའི་ཕྱིར་ཟེར་ན་མ་ཁྱབ། རྟགས་གྲུབ་སྟེ། ཀུན་རྫོབ་བདེན་པ་ཞེས་པའི་ཚིག་ཟུར་གྱི་ཀུན་རྫོབ་དེ་རྟོག་པ་ལ་བྱས་ནས། ཤེས་བྱ་དེའི་ཡུལ་དུ་ཡོད་པས་ན། ཀུན་རྫོབ་བདེན་པ་ཞེས་སྒྲ་བཤད་པ་ཡིན་པའི་ཕྱིར། རྩ་བར་འདོད་ན། སྤྱི་མཚན་སྣང་ཡུལ་དུ་བྱེད་པའི་མངོན་སུམ་གྱི་ཚད་མ་ཡོད་པར་ཐལ། ཤེས་བྱ་འཛིན་པའི་རྟོག་པ་དེ་སྤྱི་མཚན་ཡིན་པ་གང་ཞིག ། དེ་སྣང་ཡུལ་དུ་བྱེད་པའི་མངོན་སུམ་གྱི་ཚད་མ་ཡོད་པའི་ཕྱིར། རྟགས་དང་པོ་ཁས། གཉིས་པ་མ་གྲུབ་ན། ཤེས་བྱ་འཛིན་པའི་རྟོག་པ་ཆོས་ཅན། ཁྱོད་སྣང་ཡུལ་དུ་བྱེད་པའི་མངོན་སུམ་གྱི་ཚད་མ་ཡོད་པར་ཐལ། ཁྱོད་ཉམས་མྱོང་གི་རང་རིག་དེ་ཡིན་པའི་ཕྱིར། དེར་ཐལ། ཁྱོད་ཤེས་པ་ཡིན་པའི་ཕྱིར། རྩ་བར་འདོད་ན། སྤྱི་མཚན་ཆོས་ཅན། དོན་དམ་བདེན་པ་ཡིན་པར་ཐལ། ཁྱོད་སྣང་ཡུལ་དུ་བྱེད་པའི་མངོན་སུམ་གྱི་ཚད་མ་ཡོད་པའི་ཕྱིར། རྟགས་ཁས། འདོད་མི་ནུས་ཏེ། ཀུན་རྫོབ་བདེན་པ་ཡིན་པའི་ཕྱིར། དེར་ཐལ། ཀུན་རྫོབ་བདེན་པ་དང་། སྤྱི་མཚན་གཉིས་དོན་གཅིག་ཡིན་པའི་ཕྱིར།
ཁ་ཅིག་ན་རེ། ནམ་མཁའི་སྟེང་གི་གཞན་དབང་ཡིན་ན། གཞན་དབང་ཡིན་པས་ཁྱབ་ཟེར་ན། ནམ་མཁའ་ཆོས་ཅན། གཞན་དབང་ཡིན་པར་ཐལ། ནམ་མཁའི་སྟེང་གི་གཞན་དབང་ཡིན་པའི་ཕྱིར། ཁྱབ་པ་ཁས། མ་གྲུབ་ན། ནམ་མཁའ་ཆོས་ཅན། ཁྱོད་ཁྱོད་ཀྱི་སྟེང་གི་གཞན་དབང་ཡིན་པར་ཐལ། ཁྱོད་གཞི་གྲུབ་པའི་ཕྱིར། རྩ་བར་འདོད་ན། ནམ་མཁའ་ཆོས་ཅན། གཞན་དབང་མ་ཡིན་པར་ཐལ། དངོས་པོ་མ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དངོས་པོ་དང་གཞན་དང་དང་རང་མཚན་རྣམས་དོན་གཅིག་ཡིན་པའི་ཕྱིར། ཁ་ཅིག་ན་རེ། ནམ་མཁའ་ཆོས་ཅན། ནམ་མཁའི་སྟེང་གི་གཞན་དབང་མ་ཡིན་པར་ཐལ། ནམ་མཁའི་སྟེང་གི་ཀུན་བཏགས་ཡིན་པའི་ཕྱིར། མ་གྲུབ་ན། ནམ་མཁའ་ཆོས་ཅན། ནམ་མཁའི་སྟེང་གི་ཀུན་བཏགས་ཡིན་པར་ཐལ། ནམ་མཁའི་སྟེང་གི་རྟོགས་པས་བཏགས་ཙམ་གྱི་ཆོས་ཡིན་པའི་ཕྱིར་ཟེར་ན་མ་ཁྱབ།
རང་གི་ལུགས་ལ། སྒྲ་རྟོག་གིས་བཏགས་བཙམ་མ་ཡིན་པར་རང་གི་མཚན་ཉིད་ཀྱིས་གྲུབ་པའི་ཆོས་དེ་རང་མཚན་གྱི་མཚན་ཉིད། རང་མཚན་དང་། དོན་དམ་བདེན་པ་དང་། གཞན་དབང་དང་། མངོན་སུམ་གྱི་ཚན་མའི་དངོས་ཡུལ་རྣམས་དོན་གཅིག ། མཚན་གཞི་ནི་ཡོད་དེ། ཡུལ་དུས་རང་བཞིན་མ་འདྲེས་པའི་དངོས་པོ་རྣམས་དེ་ཡིན་པའི་ཕྱིར། གཟུགས་ཆོས་ཅན། ཁྱོད་ལ་རང་མཚན་ཞེས་བརྗོད་པའི་རྒྱུ་མཚན་ཡོད་དེ། དགག་བྱ་བཅད་པ་དང་། དོན་སྤྱི་བརྒྱུད་པ་སོགས་ལ་མ་ལྟོས་པར་མངོན་སུམ་གྱི་ཚད་མའི་ངོ་བོར་འཆར་རྒྱུ་ཡོད་པའི་ཆོས་ཡིན་པས་ན། དེ་ལྟར་ཞེས་བརྗོད་པ་ཡིན་པའི་ཕྱིར། ཡུལ་དུས་རང་བཞིན་མ་འདྲེས་པའི་དོན་ཡོད་དེ། དངོས་པོ་དེ་ཤར་ནུབ་གཉིས་ཀ་ན་ཡོད་ཀྱང་། ཤར་ན་ཡོད་པའི་ཆད་དེ་ཉིད། ནུབ་ན་ཡོད་པ་མ་ཡིན་པ་དེ་ཡུལ་མ་འདྲེས་པའི་དོན་དང་། དངོས་པོ་དེ་དེ་རིང་གི་སྔ་དྲོ་དང་། ཕྱི་དྲོ་གཉིས་ཀའི་དུས་སུ་ཡོད་ཀྱང་། སྔ་དྲོའི་དུས་སུ་ཡོད་པའི་ཆ་དེ་ཉིད། ཕྱི་དྲོའི་དུས་སུ་ཡོད་པ་མ་ཡིན་པ་དེ། དུས་མ་འདྲེས་པའི་པའི་དོན་དང་། དངོས་པོ་དེ་གསེར་བུམ་དང་ཟངས་བུམ་གཉིས་ཀ་ལ་རྗེས་སུ་སོང་ཀྱང་། གསེར་བུམ་ལ་རྗེས་སུ་སོང་བའི་ཆ་དེ་ཉིད་ཟངས་བུམ་ལ་རྗེས་སུ་སོང་བ་མ་ཡིན་པ་དེ་རང་བཞིན་མ་འདྲེས་པའི་དོན་ཡིན་པའི་ཕྱིར། དོན་དམ་བདེན་པའི་མཚན་ཉིད་ཡོད་དེ། དོན་དམ་པར་དོན་བྱེད་ནུས་པའི་ཆོས་དེ་ཡིན་པའི་ཕྱིར། དོན་དམ་བདེན་པ་དང་། བདེན་གྲུབ་གཉིས་དོན་གཅིག ། མཚན་གཞི་ནི་ཡོད་དེ། དངོས་པོ་ཐམས་ཅད་པོ་དེ་ཡིན་པའི་ཕྱིར། གཞན་དབང་གི་མཚན་ཉིད་ཡོད་དེ། རྐྱེན་གཞན་གྱི་དབང་གིས་སྐྱེ་བ་ཡིན་གྱི་རང་དབང་གིས་མི་སྐྱེ་བའི་དངོས་པོ་དེ་ཡིན་པའི་ཕྱིར། གཞན་དབང་དང་སྐྱེ་བ་ངོ་བོ་ཉིད་མེད་པ་གཉིས་དོན་གཅིག ། མཚན་གཞི་ནི་ཡོད་དེ། གཟུགས་དེ་ཡིན་པའི་ཕྱིར། ཆོས་རང་རང་གི་སྟེང་གི་གཞན་དབང་རེ་འཇོག་ཚུལ་ཡོད་དེ། གཟུགས་གཟུགས་ཀྱི་སྟེང་གི་གཞན་དབང་ཡིན་པ་བཞིན་དུ། རྣམ་མཁྱེན་རྣམ་མཁྱེན་གྱི་སྟེང་གི་གཞན་དབང་ཡིན་པའི་བར་ཆོས་ཐམས་ཅད་ལ་རིགས་འདྲ་བའི་ཕྱིར། སྤྱི་མཚན་གྱི་མཚན་ཉིད་ཡོད་དེ། སྒྲ་རྟོག་གི་བཏགས་པ་ཙམ་ཡིན་གྱི་རང་གི་མཚན་ཉིད་ཀྱིས་མ་གྲུབ་པའི་ཆོས་དེ་ཡིན་པའི་ཕྱིར། སྤྱི་མཚན་དང་། ཀུན་རྫོབ་བདེན་པ་གཉིས་དོན་གཅིག ། སྤྱི་མཚན་ལ་དབྱེ་ན་གཉིས་ཡོད་དེ། ཀུན་བཏགས་དང་། ཡོངས་གྲུབ་གཉིས་ཡོད་པའི་ཕྱིར། ཆོས་རང་རང་གི་སྟེང་གི་ཀུན་བཏགས་རེ་འཇོག་ཚུལ་ཡོད་དེ། གཟུགས་རང་རྐྱ་ཐུབ་པའི་རྫས་ཡོད་དུ་གྲུབ་པ་དེ་གཟུགས་ཀྱི་སྟེང་གི་ཀུན་བཏགས་ཡིན་པ་བཞིན་དུ། རྣམ་མཁྱེན་རང་རྐྱ་ཐུབ་པའི་རྫས་ཡོད་དུ་གྲུབ་པ་དེ་རྣམ་མཁྱེན་གྱི་སྟེང་གི་ཀུན་བཏགས་ཡིན་པའི་བར་ཆོས་ཐམས་ཅད་ལ་རིགས་འདྲ་བའི་ཕྱིར། ཆོས་རང་རང་གི་སྟེང་གི་ཡོངས་གྲུབ་རེ་འཇོག་ཚུལ་ཡོད་དེ༑ རྣམ་མཁྱེན་གང་ཟག་གི་བདག་ཏུ་མ་གྲུབ་པ་དེ་རྣམ་མཁྱེན་གྱི་སྟེང་གི་ཡོངས་གྲུབ་ཡིན་པ་བཞིན་དུ་ཆོས་ཐམས་ཅད་ལ་འདྲ་བའི་ཕྱིར།
དེ་ལ་རྩོད་པ་སྤོང་བ་ལ་ཁོ་ན་རེ། གཟུགས་ཆོས་ཅན། རང་མཚན་ཡིན་པར་ཐལ། རང་གི་མཚན་ཉིད་ཀྱིས་གྲུབ་པའི་ཕྱིར། རྟགས་ཁས། འདོད་ན། གཟུགས་ཆོས་ཅན། རང་གི་མཚན་ཉིད་ཡིན་པར་ཐལ། རང་མཚན་ཡིན་པའི་ཕྱིར་ཟེར་ན་མ་ཁྱབ། འདོད་མི་ནུས་ཏེ། དེ་ལ་འདོད་ལན་བཏབ་པས་གཟུགས་གཟུགས་ཀྱི་མཚན་ཉིད་ཡིན་པར་འདོད་ཅེས་རྩི་རིགས་པ་གང་ཞིག ། དེ་ལྟར་དུ་འདོད་ལན་མི་ཐེབས་པ་ཡིན་པའི་ཕྱིར།
ཁ་ཅིག་ན་རེ། གཟུགས་ཆོས་ཅན། རང་གི་མཚན་ཉིད་ཀྱིས་གྲུབ་པར་ཐལ། རང་མཚན་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་གཟུགས་གཟུགས་ཀྱི་མཚན་ཉིད་ཀྱི་གྲུབ་པར་འདོད་ཅེས་རྩི་རིགས་པར་ཐལ། དེའི་རྩི་ཚུལ་འཐད་པའི་ཕྱིར། འདོད་ན། དེ་འདྲ་བའི་ཐལ་འགྱུར་གྱི་གསལ་བ་ལ་འདོད་ལན་མི་ཐེབས་པར་ཐལ། གཟུགས་གཟུགས་ཀྱི་མཚན་ཉིད་ཀྱིས་གྲུབ་པ་མ་ཡིན་པའི་ཕྱིར་ཟེར་ན། རྟགས་མ་གྲུབ་པ་ཡིན་ཏེ། གཟུགས་གཟུགས་ཀྱི་མཚན་ཉིད་ཀྱིས་གྲུབ་པ་ཡིན་པའི་ཕྱིར། དེར་ཐལ། གཟུགས་གཟུགས་ཀྱི་རང་བཞིན་གྱིས་གྲུབ་པ་ཡིན་པའི་ཕྱིར།
ཁ་ཅིག་ན་རེ། ཤེས་བྱ་ཆོས་ཅན། ཀུན་རྫོབ་བདེན་པ་ཡིན་པར་ཐལ། སྤྱི་མཚན་ཡིན་པའི་ཕྱིར། འདོད་ན། ཤེས་བྱ་ཆོས་ཅན། ཀུན་རྫོབ་བདེན་པ་མ་ཡིན་པར་ཐལ། ཀུན་རྫོབ་རྫུན་པ་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། ཤེས་བྱ་ཆོས་ཅན། ཀུན་རྫོབ་རྫུན་པ་ཡིན་པར་ཐལ། ཀུན་རྫོབ་ཀུན་རྫོབ་ཡིན་པའི་ཕྱིར།
ཁ་ཅིག་ན་རེ། རགས་པ་ཆོས་ཅན། རང་མཚན་ཡིན་པར་ཐལ། དོན་དམ་བདེན་པ་ཡིན་པའི་ཕྱིར། མ་གྲུབ་ན། རགས་པ་ཆོས་ཅན། དོན་དམ་བདེན་པ་ཡིན་པར་ཐལ། ཡོད་པ་གང་ཞིག ། ཁྱོད་ཡིན་ན། དོན་དམ་བདེན་པ་ཡིན་པས་ཁྱབ་པའི་ཕྱིར་ཟེར་ན་མ་ཁྱབ། འདོད་ན། རགས་པ་ཆོས་ཅན། མངོན་སུམ་གྱི་ཚད་མའི་ངོ་བོར་ཡོད་པར་ཐལ། དོན་དམ་བདེན་པ་ཡིན་པའི་ཕྱིར། འདོད་ན། རགས་པ་ཆོས་ཅན། ཁྱོད་ཀྱི་རྣམ་པ་མངོན་སུམ་གྱི་ཚད་མའི་སྣང་ངོར་འཆར་ཚུལ་ཡོད་པར་ཐལ། ཁྱོད་མངོན་སུམ་གྱི་ཚད་མའི་ངོ་བོར་ཡོད་པའི་ཕྱིར། འདོད་མི་ནུས་ཏེ། ཁྱོད་ཀྱི་རྣམ་པ་མངོན་སུམ་གྱི་ཚད་མའི་སྣང་ངོར་འཆར་ཚུལ་མེད་པའི་ཕྱིར། དེར་ཐལ། ཁྱོད་ཀྱི་ཆ་དང་ཆ་ཅན་ཐ་དད་དུ་མངོན་སུམ་གྱི་ཚད་མའི་སྣང་ངོར་འཆར་ཚུལ་མེད་པའི་ཕྱིར། མ་གྲུབ་ན། རགས་པ་ཆོས་ཅན། ཁྱོད་ཀྱི་ཆ་དང་ཆ་ཅན་ཐ་དད་པ་མངོན་སུམ་གྱི་ཚད་མའི་སྣང་ངོར་འཆར་མི་རུང་བར་ཐལ། ཁྱོད་ཀྱི་ཆ་དང་ཆ་ཅན་ཐ་དད་པ་སྤྱི་མཚན་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། སྤྱི་མཚན་སྣང་ཡུལ་དུ་བྱེད་པའི་བློ་ཡིན་ན་འཁྲུལ་ཤེས་ཡིན་པས་ཁྱབ་པའི་ཕྱིར།
ཁ་ཅིག་ན་རེ། རགས་པ་རང་མཚན་ཡིན་པར་ཐལ། སྔོན་པོ་རགས་པ་རང་མཚན་ཡིན་པའི་ཕྱིར། མ་གྲུབ་ན། སྔོན་པོ་རགས་པ་རང་མཚན་ཡིན་པར་ཐལ། གཟུགས་རགས་པ་རང་མཚན་ཡིན་པའི་ཕྱིར། མ་གྲུབ་ན། གཟུགས་རགས་པ་རང་མཚན་ཡིན་པར་ཐལ། གཟུགས་རང་མཚན་ཡིན་པ་གང་ཞིག ། གཟུགས་རགས་པ་ཡོད་པའི་ཕྱིར་ཟེར་ན་མ་ཁྱབ། རྟགས་གྲུབ་སྟེ། གཟུགས་རགས་པ་སྤྱི་མཚན་ཡིན་པའི་ཕྱིར། །
རྩོམ་སྒྲིག་པ། བློ་བཟང་བཀྲ་ཤིས།