བསེ་བསྡུས་ལས་དགག་སྒྲུབ་ཀྱི་རྣམ་བཞག
དགག་སྒྲུབ་ཀྱི་རྣམ་བཞག་བཤད་པ་ལ།
ཁ་ཅིག་ན་རེ། དངོས་པོ་ཡིན་ན་སྒྲུབ་པ་ཡིན་པས་ཁྱབ་ཟེར་ན། སྒྲ་མི་རྟག་པ་ཆོས་ཅན། སྒྲུབ་པ་ཡིན་པར་ཐལ། དངོས་པོ་ཡིན་པའི་ཕྱིར། ཁྱབ་པ་ཁས། འདོད་ན། སྒྲ་མི་རྟག་པ་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། དེར་ཐལ། རང་དངོས་སུ་རྟོགས་པའི་བློས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་པ་གང་ཞིག ། རང་ཞེས་བརྗོད་པའི་སྒྲས་རང་གི་དགག་བྱ་དངོས་སུ་བཅད་ནས་བརྗོད་དགོས་པའི་ཆོས་ཡིན་པའི་ཕྱིར། རྟགས་གཉིས་པ་གྲུབ་སྟེ། སྒྲ་མི་རྟག་ཅེས་བརྗོད་པའི་སྒྲས་སྒྲ་རྟག་པ་ཡིན་པ་ཚིག་ཟིན་ལ་དངོས་སུ་བཅད་ནས་སྒྲ་མི་རྟག་པར་བརྗོད་པར་བྱ་བ་དེ་ཡིན་པའི་ཕྱིར། དེ་འཛིན་པའི་བློ་ལ་ཡང་རིགས་འདྲ།
ཁ་ཅིག་ན་རེ། རང་གི་དངོས་མིང་གི་མཐར་མེད་ཚིག་སྦྱར་བའི་ཆོས་ཡིན་ན། མེད་དགག་ཡིན་པས་ཁྱབ་ཟེར་ན། སངས་རྒྱས་ཚེ་དཔག་མེད་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། སངས་རྒྱས་ཚེ་དཔག་མེད་ཆོས་ཅན། དེར་ཐལ། སངས་རྒྱས་ཚེ་དཔག་མེད་ཅེས་བརྗོད་པའི་སྒྲ་དེ་ཁྱོད་ཀྱི་དངོས་མིང་ཡིན་པ་གང་ཞིག ། དེའི་མཐར་མེད་ཚིག་སྦྱར་བ་མངོན་སུམ་དུ་གྲུབ་པ་ཡིན་པའི་ཕྱིར། རྩ་བར་འདོད་ན་སངས་རྒྱས་ཚེ་དཔག་མེད་ཆོས་ཅན། མེད་དགག་མ་ཡིན་པར་ཐལ། དངོས་པོ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། མེད་དགག་ཡིན་ན་རྟག་པ་ཡིན་པས་ཁྱབ་པའི་ཕྱིར།
ཁ་ཅིག་ན་རེ། དགག་པ་ཡིན་ན་རང་གི་དངོས་མིང་ལ་དགག་ཚིག་སྦྱར་བའི་ཆོས་ཡིན་པས་ཁྱབ་ཟེར་ན། ནམ་མཁའ་ཆོས་ཅན། རང་གི་དངོས་མིང་ལ་དགག་ཚིག་སྦྱར་བའི་ཆོས་ཡིན་པར་ཐལ། དགག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། ནམ་མཁའ་ཆོས་ཅན། དགག་པ་ཡིན་པར་ཐལ། མེད་དགགཡིན་པའི་ཕྱིར། མ་གྲུབ་ན། ནམ་མཁའ་ཆོས་ཅན། མེད་དགག་ཡིན་པར་ཐལ། ཐོག་རེག་བཅད་ཙམ་གྱི་མེད་དགག་ཡིན་པའི་ཕྱིར། དེར་ཐལ། འདུས་མ་བྱས་ཀྱི་ནམ་མཁའ་ཡིན་པའི་ཕྱིར། རྩ་བར་འདོད་ན། ནམ་མཁའ་ཆོས་ཅན། རང་གི་དངོས་མིང་ལ་དགག་ཚིག་སྦྱར་བའི་ཆོས་མ་ཡིན་པར་ཐལ། ཁྱོད་ཀྱི་དངོས་མིང་གི་ཟུར་དུ་དགག་ཚིག་མེད་པའི་ཕྱིར། མ་གྲུབ་ན། ནམ་མཁའ་ཆོས་ཅན། ཁྱོད་ཀྱི་དངོས་མིང་གི་ཟུར་དུ་དགག་ཚིག་མེད་པར་ཐལ། ནམ་མཁའ་ཞེས་པའི་སྒྲ་དེ་ཁྱོད་ཀྱི་དངོས་མིང་ཡིན་པ་གང་ཞིག ནམ་དང་མཁའ་ཞེས་པ་གཉིས་གང་ཡང་དགག་ཚིག་མ་ཡིན་པའི་ཕྱིར། གཞན་ཡང་། ཆོས་ཉིད་ཆོས་ཅན། རང་གི་དངོས་མིང་གི་མཐར་དགག་ཚིག་སྦྱར་བའི་ཆོས་ཡིན་པར་ཐལ། དགག་པ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། མེད་དགག་ཡིན་པའི་ཕྱིར། རྩ་བར་འདོད་མི་ནུས་ཏེ། རང་གི་དངོས་མིང་གི་མཐར་དགག་ཚིག་མ་སྦྱར་ཀྱང་། རང་དངོས་སུ་རྟོགས་པའི་བློས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་པའི་ཕྱིར། ཁྱབ་སྟེ། རང་དངོས་སུ་རྟོགས་པའི་བློས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་ན་དགག་པ་ཡིན་པས་ཁྱབ་པའི་ཕྱིར།
དེ་ལ་ཁ་ཅིག་ན་རེ། གཟུགས་ཆོས་ཅན། དགག་པ་ཡིན་པར་ཐལ། རང་དངོས་སུ་རྟོགས་པའི་བློས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། དེར་ཐལ། རང་དངོས་སུ་རྟོགས་པའི་རྟོག་པས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། དེར་ཐལ༑ རང་འཛིན་པའི་རྟོག་པས་རང་མ་ཡིན་པ་རྣམ་པར་བཅད་ནས་རྟོགས་དགོས་པའི་ཆོས་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། གཟུགས་ཆོས་ཅན། ཁྱོད་འཛིན་པའི་རྟོག་པས་ཁྱོད་མ་ཡིན་པ་རྣམ་པར་བཅད་ནས་རྟོགས་དགོས་པའི་ཆོས་ཡིན་པར་ཐལ། ཁྱོད་གཞི་གྲུབ་པའི་ཕྱིར།
ཁ་ཅིག་ན་རེ། བུམ་པ་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། དགག་པ་ཡིན་པར་ཐལ། རང་དངོས་སུ་རྟོགས་པའི་རྟོག་པས་རང་མ་ཡིན་པ་རྣམ་པར་བཅད་ནས་རྟོགས་དགོས་པའི་ཆོས་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། བུམ་པ་ཆོས་ཅན། ཁྱོད་དངོས་སུ་རྟོགས་པའི་རྟོག་པས་ཁྱོད་མ་ཡིན་པ་རྣམ་པར་བཅད་ནས་རྟོགས་དགོས་པའི་ཆོས་ཡིན་པར་ཐལ། ཁྱོད་གཞི་གྲུབ་པའི་ཕྱིར། རྩ་བར་འདོད་ན། བུམ་པ་ཆོས་ཅན། དགག་པ་མ་ཡིན་པར་ཐལ། སྒྲུབ་པ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། སྒྲུབ་པ་ཡིན་པར་ཐལ། བུམ་པ་དང་གཅིག་ཡིན་པའི་ཕྱིར།
ཁ་ཅིག་ན་རེ། མ་ཡིན་དགག་ཡིན་ན། རང་ཞེས་བརྗོད་པའི་སྒྲས་རང་གི་དགག་བྱ་བཀག་ཤུལ་དུ་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པའི་ཆོས་ཡིན་པས་ཁྱབ་ཟེར་ན། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཆོས་ཅན། མ་ཡིན་དགག་ཡིན་པར་ཐལ། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པའི་ཕྱིར། དེར་ཐལ། རང་ཞེས་བརྗོད་པའི་སྒྲས་ཉིན་པར་ཟས་ཟ་བ་དངོས་སུ་བཀག་ནས་མཚན་མོ་ཟ་བ་ཤུགས་ལ་འཕངས་པ་གང་ཞིག ། མཚན་མོ་ཟ་བ་སྒྲུབ་པ་ཡིན་པའི་ཕྱིར། རྩ་བར་འདོད་མི་ནུས་ཏེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་མི་འཕེན་ཀྱང་ཤུགས་ལ་འཕེན་པར་བྱེད་པ་དེ་ཡིན་པའི་ཕྱིར། དེར་ཐལ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་སྒྲ་འདིས་ཉིན་པར་ཟས་ཟ་བ་དངོས་སུ་བཀག་ནས་མཚན་མོ་ཟ་བ་ཤུགས་ལ་འཕེན་པ་ཡིན་པའི་ཕྱིར།
བྱས་པ་ལ་ཁོ་ན་རེ། ལྷས་སྦྱིན་ཚོན་པོ་ཉིན་བར་ཟས་མི་ཟ་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་ཤུགས་ལ་འཕེན་པར་བྱེད་པ་མ་ཡིན་པར་ཐལ། བྲམ་ཟེ་ཆང་མི་འཐུད་པ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་ཤུགས་ལ་འཕེན་པ་མ་ཡིན་པའི་ཕྱིར་ཟེར་ན་མ་ཁྱབ༑ རྟགས་གྲུབ་སྟེ། བྲམ་ཟེ་ཆང་མི་འཐུང་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་ཤུགས་གང་རུང་དུ་མི་འཕེན་པ་ཡིན་པའི་ཕྱིར། དེར་ཐལ། བྲམ་ཟེ་ཆང་མི་འཐུང་བ་ཞེས་པའི་སྒྲ་འདིས་བྲམ་ཟེ་ཆང་འཐུང་བ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་མི་འཕེན་པར་བྱེད་པ་ཡིན་པའི་ཕྱིར། དེར་ཐལ། བྲམ་ཟེ་ཆང་མི་འཐུང་བ་མེད་དགག་ཏུ་འཇོག་དགོས་པ་ཡིན་པའི་ཕྱིར།
ཁ་ཅིག་ན་རེ། མ་ཡིན་དགག་ཡིན་ན། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པས་ཁྱབ་ཟེར་ན། རྟག་པ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། རྟག་པ་ཆོས་ཅན། མ་ཡིན་དགག་ཡིན་པར་ཐལ། དགག་པ་གང་ཞིག ། མེད་དགག་མ་ཡིན་པའི་ཕྱིར། རྟགས་དང་པོ་མ་གྲུབ་ན། རྟག་པ་ཆོས་ཅན། དགག་པ་ཡིན་པར་ཐལ། རྟག་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རྟག་པར་གྱུར་པའི་སྒྲུབ་པ་རང་དབང་བ་མེད་པའི་ཕྱིར། དེར་ཐལ། སྒྲུབ་པ་རང་དབང་བ་ཡིན་ན་དངོས་པོ་ཡིན་པས་ཁྱབ་པའི་ཕྱིར། གོང་དུ་འདོད་མི་ནུས་ཏེ། རང་ཞེས་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་ཀྱང་། རང་གི་དགག་བྱ་ཚིག་ཟིན་ལ་འགོག་པར་བྱེད་པ་མ་ཡིན་པའི་ཕྱིར། དེར་ཐལ། རྟག་པ་ཞེས་པའི་ཚིག་འདི་ལ་དགག་ཚིག་སྦྱར་བ་མེད་པའི་ཕྱིར།
ཁ་ཅིག་ན་རེ། རང་ཞེས་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་ན། རང་ཉིད་དགག་པ་ཡིན་པས་ཁྱབ་ཟེར་ན། བྱས་པ་ཆོས་ཅན། རང་ཉིད་དགག་པ་ཡིན་པར་ཐལ། རང་ཞེས་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། བྱས་པ་ཆོས་ཅན། ཁྱོད་ཅེས་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པར་ཐལ། ཁྱོད་ཅེས་བརྗོད་པའི་སྒྲས་ཁྱོད་ཀྱི་རྒྱུ་རྐྱེན་འཕེན་པར་བྱེད་པ་ཡིན་པའི་ཕྱིར། རྩ་བར་འདོད་ན། བྱས་པ་ཆོས་ཅན། དགག་པ་མ་ཡིན་པར་ཐལ། སྒྲུབ་པ་ཡིན་པའི་ཕྱིར། མ་གྲུབ་ན། བྱས་པ་སྒྲུབ་པ་ཡིན་པར་ཐལ། དངོས་པོ་སྒྲུབ་པ་ཡིན་པ་གང་ཞིག ། དེ་གཉིས་འདྲ་བའི་ཕྱིར།
ཁ་ཅིག་ན་རེ། བྱས་པ་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། མ་གྲུབ་ན། བྱས་པ་དགག་པ་ཡིན་པར་ཐལ། སྒྲ་བྱས་པ་དགག་པ་ཡིན་པའི་ཕྱིར། མ་གྲུབ་ན། དེར་ཐལ། སྒྲ་བྱས་པ་ཡིན་ནོ་ཞེས་པའི་སྒྲ་འདིས་སྒྲ་བྱས་པ་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་ཡིན་པའི་ཕྱིར་ཟེར་ན་མ་ཁྱབ། འོ་ན། ཁྱོད་རང་ལ་གཟུགས་དགག་པ་ཡིན་པར་ཐལ། གཟུགས་ཞེས་བརྗོད་པའི་སྒྲས་གཟུགས་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་ཡིན་པའི་ཕྱིར། འདོད་ན། སྒྲུབ་པ་མེད་པར་ཐལ། གཟུགས་སྒྲུབ་པ་མ་ཡིན་པའི་ཕྱིར། འདོད་ན། གཞི་གྲུབ་ན། དགག་པ་ཡིན་པས་ཁྱབ་པར་ཐལ། སྒྲུབ་པ་མེད་པའི་ཕྱིར། རྟགས་ཁས། འདོད་མི་ནུས།
ཁ་ཅིག་ན་རེ། གཟུགས་དེ་གཟུགས་ཞེས་བརྗོད་པའི་སྒྲ་འདིས་གཟུགས་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་མིན་ཟེར་ན། དེ་ཡིན་པར་ཐལ། གཟུགས་དེ་གཟུགས་ཞེས་བརྗོད་པའི་སྒྲས་གཟུགས་མ་ཡིན་པ་རྣམ་པར་བསལ་ནས་བརྗོད་དགོས་པའི་ཆོས་ཡིན་པའི་ཕྱིར། དེར་ཐལ། གཟུགས་ཞེས་བརྗོད་པའི་སྒྲ་གཟུགས་ལ་སེལ་འཇུགཡིན་པའི་ཕྱིར། ཁྱབ་སྟེ། སེལ་འཇུག་ཅེས་པའི་སེལ་བའི་དོན་ནི་ཆོས་དེ་མ་ཡིན་པ་རྣམ་པར་སེལ་བ་ལ་ལྟོས་དགོས་པ་ཡིན་པའི་ཕྱིར།
རང་གི་ལུགས་ལ། དགག་པའི་མཚན་ཉིད་ཡོད་དེ། རང་དངོས་སུ་རྟོགས་པའི་བློས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་དེ་ཡིན་པའི་ཕྱིར། དགག་པ་དང་། སེལ་བ་དང་། གཞན་སེལ་དང་། ལྡོག་པ་བཞི་དོན་གཅིག ། དགག་པ་ལ་དབྱེ་ན་གཉིས་ཡོད་དེ། མ་ཡིན་དགག་དང་མེད་དགག་གཉིས་ཡོད་པའི་ཕྱིར། མ་ཡིན་དགག་གི་མཚན་ཉིད་ཡོད་དེ། རང་ཞེས་བརྗོད་པའི་སྒྲས་རང་གི་དགག་བྱ་བཀག་ཤུལ་དུ་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པའི་དགག་པ་དེ་ཡིན་པའི་ཕྱིར། མཚན་གཞི་ནི་ཡོད་དེ། སྒྲ་མི་རྟག་པ་དེ་ཡིན་པའི་ཕྱིར། མེད་དགགགི་མཚན་ཉིད་ཡོད་དེ། རང་ཞེས་བརྗོད་པའི་སྒྲས་རང་གི་དགག་བྱ་བཀག་ཤུལ་དུ་ཆོས་གཞན་མ་ཡིན་དགག་དང་སྒྲུབ་པ་གང་རུང་མི་འཕེན་པའི་དགག་པ་དེ་ཡིན་པའི་ཕྱིར། མཚན་གཞི་ནི་ཡོད་དེ། གང་ཟག་གི་བདག་མེད་དེ་ཡིན་པའི་ཕྱིར། དགག་པ་ལ་དབྱེ་ན་ལྔ་ཡོད་དེ། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པ་དང་། ཤུགས་ལ་འཕེན་པ་དང་། དངོས་ཤུགས་གཉིས་ཀར་འཕེན་པ་དང་། ཀྐབས་ཐོབ་ཀྱིས་འཕེན་པ་དང་། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་མི་འཕེན་པ་དང་ལྔ་ཡོད་པའི་ཕྱིར། དང་པོ་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པའི་དགག་པ་ཡོད་དེ། བུམ་པ་གང་ཟག་གི་བདག་མེད་ཡོད་པ་དེ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པའི་དགག་པ་ཡིན་པར་ཐལ། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་པ་གང་ཞིག ། ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པ་ཡིན་པའི་ཕྱིར། རྟགས་དང་པོ་གྲུབ་སྟེ། བུམ་པ་གང་ཟག་གི་བདག་མེད་ཡོད་པ་ཞེས་བརྗོད་པའི་སྒྲ་འདིས་བུམ་པ་གང་ཟག་གི་བདག་ཚིག་ཟིན་ལ་འགོག་པར་བྱེད་པ་ཡིན་པའི་ཕྱིར། རྟགས་གཉིས་པ་གྲུབ་སྟེ། བུམ་པ་གང་ཟག་གི་བདག་མེད་ཡོད་པ་ཞེས་བརྗོད་པའི་སྒྲ་འདིས་བུམ་པ་གང་ཟག་གི་བདག་མེད་ཡོད་པ་དངོས་སུ་འཕངས་པ་གང་ཞིག ། བུམ་པ་གང་ཟག་གི་བདག་མེད་ཡོད་པ་མ་ཡིན་དགག་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། བུམ་པ་གང་ཟག་གི་བདག་མེད་ཆོས་ཅན། ཁྱོད་ཡོད་པ་མ་ཡིན་དགག་ཡིན་པར་ཐལ། ཁྱོད་གཞི་གྲུབ་པའི་ཕྱིར། གཉིས་པ་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་ཤུགས་ལ་འཕེན་པའི་དགག་པ་བཞག་ཏུ་ཡོད་དེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་དེ་ཡིན་པའི་ཕྱིར། དེར་ཐལ། ལྷས་སྦྱིན་ཚོན་པོ་ཉིན་པར་ཟས་མི་ཟ་བཞེས་པའི་ཚིག་འདིས་རང་གི་དགག་བྱ་ཉིན་པར་ཟས་ཟ་བ་དངོས་སུ་བཀག་ནས་མཚན་མོ་ཟ་བ་ཤུགས་ལ་འཕངས་པ་གང་ཞིག ། མཚན་མོ་ཟ་བ་སྒྲུབ་པ་ཡིན་པའི་ཕྱིར། དེར་ཐལ། ཟས་ཟ་བ་སྒྲུབ་པ་ཡིན་པའི་ཕྱིར། གསུམ་པ་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་ཤུགས་གཉིས་ཀར་འཕེན་པའི་དགོས་པ་བཞག་ཏུ་ཡོད་དེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ལུས་རིང་པ་མ་ཡིན་པ་ཡོད་པ་དེ་ཡིན་པའི་ཕྱིར། དེར་ཐལ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ལུས་རིང་པ་མ་ཡིན་པ་ཡོད་པ་ཞེས་པའི་སྒྲ་འདིས་ཉིན་པར་ཟས་ཟ་བ་དངོས་སུ་བཀག་ནས་མཚན་མོ་ཟ་བ་ཤུགས་ལ་འཕངས། ལུས་རིང་པ་མ་ཡིན་པ་ཡོད་པ་དངོས་སུ་འཕངས་པ་གང་ཞིག ། མཚན་མོ་ཟ་བ་སྒྲུབ་པ་དང་། ལུས་རིད་པ་མ་ཡིན་པ་ཡོད་པ་མ་ཡིན་དགགཡིན་པའི་ཕྱིར། བཞི་པ་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་སྐབས་ཐོབ་ཀྱིས་འཕེན་པའི་དགག་པ་བཞག་ཏུ་ཡོད་དེ། གང་ཟག་གཅིག་རྒྱལ་རིགས་དང་བྲམ་ཟེའི་རིགས་གང་རུང་དུ་ངེས་ནས་ཁྱད་པར་མ་ངེས་པའི་ཚེ་འདི་ནི་བྲམ་ཟེ་མ་ཡིན་པ་ཞེས་པའི་སྒྲ་འདིས་བྲམ་ཟེ་ཡིན་པ་ཚིག་ཟིན་ལ་དངོས་སུ་བཀག་ནས་རྒྱལ་རིགས་ཡིན་པ་སྐབས་ཐོབ་ཀྱིས་འཕངས་པ་ངེས་ཤེས་དགོས་པ་ཡིན་པའི་ཕྱིར། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་མི་འཕེན་པའི་དགག་པ་བཞག་ཏུ་ཡོད་དེ། བྲམ་ཟེ་ཆང་མི་འཐུང་བ་དེ་ཡིན་པའི་ཕྱིར། དེར་ཐལ། བྲམ་ཟེ་ཆང་མི་འཐུང་བ་ཞེས་པའི་སྒྲ་འདིས་བྲམ་ཟེ་ཆང་འཐུང་བ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་ཡང་མི་འཕེན་ཤུགས་ལ་ཡང་མི་འཕེན། སྐབས་ཐོབ་ཀྱིས་ཡང་མི་འཕེན་པ་ཡིན་པའི་ཕྱིར། དེ་དག་མ་ཡིན་དགག་དང་མེད་དགག་གཉིས་སུ་འདུ་ཚུལ་ཡོད་དེ། དང་པོ་བཞི་པོ་མ་ཡིན་དགག་དང་། ཕྱི་མ་མེད་དགག་ཏུ་འཇོག་དགོས་པ་ཡིན་པའི་ཕྱིར། དགག་པ་ཡིན་ན་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་འགོག་པས་མ་ཁྱབ་པ་ཡིན་ཏེ། མ་ཡིན་དགག་ལ་མ་ཁྱབ་པ་གང་ཞིག ། མེད་དགག་ལ་ཡང་མ་ཁྱབ་པའི་ཕྱིར། རྟགས་དང་པོ་གྲུབ་སྟེ། རྟག་པ་དང་ཤེས་བྱ་གཉིས་མ་ཡིན་དགག་ཡིན་ཀྱང་། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་འགོག་པར་བྱེད་པ་མ་ཡིན་པའི་ཕྱིར། རྟགས་གཉིས་པ་གྲུབ་སྟེ། ནམ་མཁའ་དང་ཆོས་ཉིད་གཉིས་མེད་དགག་ཡིན་ཀྱང་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་འགོག་པར་བྱེད་པ་མ་ཡིན་པའི་ཕྱིར།
རྩོམ་སྒྲིག་པ། བློ་བཟང་བཀྲ་ཤིས།