བསེ་བསྡུས་ལས་གཞན་སེལ་གྱི་རྣམ་བཞག
གཞན་སེལ་གྱི་རྣམ་བཞག་བཤད་པ་ལ།
ཁ་ཅིག་ན་རེ། ཁྱོད་ཀྱི་གཞན་སེལ་གསུམ་པོ་གང་རུང་ཡོད་ན། ཁྱོད་ཀྱི་གཞན་སེལ་ཡོད་པས་ཁྱབ་ཟེར་ན། རི་བོང་རྭ་ཆོས་ཅན། ཁྱོད་ཀྱི་གཞན་སེལ་ཡོད་པར་ཐལ། ཁྱོད་ཀྱི་གཞན་སེལ་གསུམ་པོ་གང་རུང་ཡོད་པའི་ཕྱིར། ཁྱབ་པ་ཁས། མ་གྲུབ་ན། རི་བོང་རྭ་ཆོས་ཅན། ཁྱོད་ཀྱི་གཞན་སེལ་གསུམ་པོ་གང་རུང་ཡོད་པར་ཐལ། ཁྱོད་ཀྱི་བློའི་གཞན་སེལ་ཡོད་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཁྱོད་ཀྱི་བློའི་གཞན་སེལ་ཡོད་པར་ཐལ། ཁྱོད་འཛིན་རྟོག་པ་ལ་ཁྱོད་མ་ཡིན་པ་ལས་ལོག་པར་སྣང་བ་དེ་ཁྱོད་ཀྱི་བློའི་གཞན་སེལ་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཁྱོད་འཛིན་རྟོག་པ་ལ་ཁྱོད་མ་ཡིན་པ་ལས་ལོག་པར་སྣང་བ་དེ་ཁྱོད་ཀྱི་བློའི་གཞན་སེལ་ཡིན་པར་ཐལ། བདག་མེད་ཡིན་པའི་ཕྱིར། རྩ་བར་འདོད་ན། རི་བོང་རྭ་ཆོས་ཅན། ཁྱོད་ཀྱི་གཞན་སེལ་མེད་པར་ཐལ། ཁྱོད་ཀྱི་དོན་རང་མཚན་གྱི་གཞན་སེལ་མེད་པའི་ཕྱིར། དེར་ཐལ། ཁྱོད་དངོས་པོ་མ་ཡིན་པའི་ཕྱིར།
ཁ་ཅིག་ན་རེ། དངོས་པོ་ཡིན་ན། དོན་རང་མཚན་གྱི་གཞན་སེལ་ཡིན་པས་ཁྱབ་ཟེར་ན། བུམ་པ་ཆོས་ཅན། དོན་རང་མཚན་གྱི་གཞན་སེལ་ཡིན་པར་ཐལ། དངོས་པོ་ཡིན་པའི་ཕྱིར། ཁྱབ་པ་ཁས། འདོད་ན། བུམ་པ་ཆོས་ཅན། གཞན་སེལ་ཡིན་པར་ཐལ། དོན་རང་མཚན་གྱི་གཞན་སེལ་ཡིན་པའི་ཕྱིར། འདོད་ན། བུམ་པ་ཆོས་ཅན། དགག་པ་ཡིན་པར་ཐལ། གཞན་སེལ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། གཞན་སེལ་དང་དགག་པ་གཉིས་དོན་གཅིག་ཡིན་པའི་ཕྱིར། རྩ་བར་འདོད་མི་ནུས་ཏེ། སྒྲུབ་པ་ཡིན་པའི་ཕྱིར།
ཁ་ཅིག་ན་རེ། བུམ་པ་མ་ཡིན་པ་ལས་ལོག་པ་དེ་བུམ་པའི་དོན་རང་མཚན་གྱི་གཞན་སེལ་ཡིན་ཟེར་ན། བུམ་པ་མ་ཡིན་པ་ལས་ལོག་པ་ཆོས་ཅན། བུམ་པའི་དོན་རང་མཚན་གྱི་གཞན་སེལ་མ་ཡིན་པར་ཐལ། བུམ་པའི་དོན་རང་མཚན་གྱི་ཆོས་མ་ཡིན་པའི་ཕྱིར། མ་གྲུབ་ན། བུམ་པ་མ་ཡིན་པ་ལས་ལོག་པ་ཆོས་ཅན། བུམ་པའི་དོན་རང་མཚན་གྱི་ཆོས་མ་ཡིན་པར་ཐལ། རང་མཚན་གྱི་ཆོས་མ་ཡིན་པའི་ཕྱིར། མ་གྲུབ་ན། བུམ་པ་མ་ཡིན་པ་ལས་ལོག་པ་ཆོས་ཅན། དངོས་པོ་ཡིན་པར་ཐལ། རང་མཚན་གྱི་ཆོས་ཡིན་པའི་ཕྱིར། རྟགས་ཁས། མ་ཁྱབ་ན་ཁྱབ་པ་ཡོད་པར་ཐལ། རང་མཚན་གྱི་ཆོས་དང་དངོས་པོ་གཉིས་དོན་གཅིག་ཡིན་པའི་ཕྱིར། རྩ་བར་འདོད་ན། བུམ་པ་མ་ཡིན་པ་ལས་ལོག་པ་དངོས་པོ་མ་ཡིན་པར་ཐལ། བུམ་པ་མ་ཡིན་པ་མ་ཡིན་པ་དངོས་པོ་མ་ཡིན་པ་གང་ཞིག ། དེ་གཉིས་ལ་ཁྱད་པར་མེད་པའི་ཕྱིར།
ཁ་ཅིག་ན་རེ། ཁྱོད་ཀྱི་དོན་རང་མཚན་གྱི་གཞན་སེལ་ཡོད་ན། ཁྱོད་མ་ཡིན་པ་ལས་ལོག་པ་ཡོད་པས་ཁྱབ་ཟེར་ན། ཀྭ་བུམ་གཉིས་ཆོས་ཅན། ཁྱོད་མ་ཡིན་པ་ལས་ལོག་པ་ཡོད་པར་ཐལ། ཁྱོད་ཀྱི་དོན་རང་མཚན་གྱི་གཞན་སེལ་ཡོད་པའི་ཕྱིར། ཁྱབ་པ་ཁས། མ་གྲུབ་ན། ཀྭ་བུམ་གཉིས་ཆོས་ཅན། ཁྱོད་ཀྱི་དོན་རང་མཚན་གྱི་གཞན་སེལ་ཡོད་པར་ཐལ། ཁྱོད་དོན་རང་མཚན་གྱི་ཆོས་ཡིན་པའི་ཕྱིར། རྩ་བར་འདོད་ན། ཀྭ་བུམ་གཉིས་ཆོས་ཅན། ཁྱོད་མ་ཡིན་པ་ལས་ལོག་པ་མེད་པར་ཐལ། ཁྱོད་ཡིན་པ་མི་སྲིད་པའི་ཤེས་བྱ་ཡིན་པའི་ཕྱིར།
ཁ་ཅིག་ན་རེ། ཀྭ་བུམ་གཉིས་ཆོས་ཅན། ཁྱོད་ཀྱི་དོན་རང་མཚན་གྱི་གཞན་སེལ་མེད་པར་ཐལ། ཀྭ་བུམ་གཉིས་དེ་དེ་མ་ཡིན་པ་གང་ཞིག ། དེ་ལས་ཐ་དད་པ་གཅིགམེད་པའི་ཕྱིར་ཟེར་ན་རྟགས་ཕྱི་མ་མ་གྲུབ་པ་ཡིན་ཏེ། རྟག་དངོས་གཉིས་ཀྱིས་སྟོང་པའི་ཀྭ་བུམ་གཉིས་དེ་ཡིན་པའི་ཕྱིར།
ཁ་ཅིག་ན་རེ། བུམ་པའི་དོན་རང་མཚན་གྱི་གཞན་སེལ་འཇོག་པའི་ཚེ་ན། རྟག་དངོས་གཉིས་ཀྱིས་སྟོང་པའི་བུམ་པ་དེ་འཇོགདགོས་པ་ཡིན་ཟེར་ན། དེ་མི་འཐད་པར་ཐལ། བུམ་པ་མ་ཡིན་པ་ལས་ལོག་པའི་བུམ་པ་དེ་བུམ་པའི་དོན་རང་མཚན་གྱི་གཞན་སེལ་ལ་བཞག་ཆོག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། བུམ་པའི་དོན་རང་མཚན་གྱི་གཞན་སེལ་ཡིན་པར་ཐལ། བུམ་པའི་གཞན་སེལ་ཡིན་པའི་ཕྱིར། ཁ་ཅིག་ན་རེ། བུམ་པའི་མེད་དགག་གི་གཞན་སེལ་འཇོག་པའི་ཚེ་ན། བུམ་པ་གང་ཟག་གི་བདག་མེད་དེ་འཇོག་ཟེར་ན། དེ་མི་འཐད་པ་ཡིན་པར་ཐལ། བུམ་པ་ལ་བུམ་པ་མ་ཡིན་པ་མེད་པ་དེ་བུམ་པའི་མེད་དགག་གི་གཞན་སེལ་ལ་འཇོག་དགོས་པ་ཡིན་པའི་ཕྱིར། དེར་ཐལ། བ་ལང་ལ་བ་ལང་མ་ཡིན་པ་མེད་པ་བ་ལང་གི་མེད་དགག་གི་གཞན་སེལ་ལ་འཇོག་དགོས་པ་ཡིན་པའི་ཕྱིར། དེར་ཐལ། ཚད་ཆེན་ལས་བཤད་པ་ཡིན་པའི་ཕྱིར།
ཁ་ཅིག་ན་རེ། བློ་མ་ཡིན་པ་ལས་ལོག་པའི་བློ་དེ་བློའི་དོན་རང་མཚན་གྱི་གཞན་སེལ་ཡིན་པར་ཐལ། བུམ་པ་མ་ཡིན་པ་ལས་ལོག་པའི་བུམ་པ་དེ་བུམ་པའི་དོན་རང་མཚན་གྱི་གཞན་སེལ་ཡིན་པ་གང་ཞིག ། དེ་གཉིས་འདྲ་བའི་ཕྱིར། འདོད་ན། བློ་མ་ཡིན་པ་ལས་ལོགཔའི་བློ་ཆོས་ཅན། བློའི་གཞན་སེལ་ཡིན་པར་ཐལ། བློའི་དོན་རང་མཚན་གྱི་གཞན་སེལ་ཡིན་པའི་ཕྱིར་ཟེར་ན་མ་ཁྱབ། ཁོ་ན་རེ། བློ་ཆོས་ཅན། ཁྱོད་མ་ཡིན་པ་ལས་ལོག་པའི་ཁྱོད། ཁྱོད་ཀྱི་གཞན་སེལ་ཡིན་པར་ཐལ། ཁྱོད་ཡིན་པ་སྲིད་པའི་དངོས་པོ་ཡིན་པའི་ཕྱིར་ཟེར་ན་འདོད་ལན་ཐེབས་པ་ཡིན་ཏེ། རྩི་བའི་ཚེ་ན། བློ་མ་ཡིན་པ་ལས་ལོག་པའི་བློ་དེ་བློ་དེའི་གཞན་སེལ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར།
བྱས་པ་ལ་ཁོ་ན་རེ། བློ་མ་ཡིན་པ་ལས་ལོག་པའི་བློ་བློའི་གཞན་སེལ་ཡིན་པར་ཐལ། བློ་མ་ཡིན་པ་ལས་ལོག་པའི་བློ་དེ་བློ་དེའི་གཞན་སེལ་ཡིན་པའི་ཕྱིར་ཟེར་ན་མ་ཁྱབ། འདོད་མི་ནུས་ཏེ། བློའི་གཞན་སེལ་ཡིན་ན་རྟག་པ་ཡིན་པས་ཁྱབ་པའི་ཕྱིར།
ཁ་ཅིག་ན་རེ། རྟག་པ་མ་ཡིན་པ་ལས་ལོག་པའི་རྟག་པ་དེ་རྟག་པའི་གཞན་སེལ་ཡིན་པར་ཐལ། བུམ་པ་མ་ཡིན་པ་ལས་ལོག་པའི་བུམ་པ་དེ་བུམ་པའི་གཞན་སེལ་ཡིན་པའི་ཕྱིར་ཟེར་ན་མ་ཁྱབ། འདོད་ན། དེ་ཆོས་ཅན། རྟག་པའི་གཞན་སེལ་མ་ཡིན་པར་ཐལ། རྟག་པའི་དོན་རང་མཚན་གྱི་གཞན་སེལ་མ་ཡིན། རྟག་པའི་མེད་དགག་གི་གཞན་སེལ་ཡང་མ་ཡིན། རྟག་པའི་བློའི་གཞན་སེལ་ཡང་མ་ཡིན་པའི་ཕྱིར། རྟགས་དང་པོ་མ་གྲུབ་ན། དེ་ཆོས་ཅན། རྟག་པའི་དོན་རང་མཚན་གྱི་གཞན་སེལ་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར།
ཁ་ཅིག་ན་རེ། འདུ་མ་བྱས་ཀྱི་ནམ་མཁའ་ཆོས་ཅན། མེད་དགག་གི་དོན་རང་མཚན་གྱི་གཞན་སེལ་ཡིན་པར་ཐལ། མེད་དགག་གི་གཞན་སེལ་ཡིན་པའི་ཕྱིར་ཟེར་ན་མ་ཁྱབ། བྱས་པ་ལ་ཁོ་ན་རེ། མེད་དགག་ཆོས་ཅན། ཁྱོད་ཀྱི་གཞན་སེལ་ཡིན་ན་ཁྱོད་ཀྱི་དོན་རང་མཚན་གྱི་གཞན་སེལ་ཡིན་པས་ཁྱབ་པར་ཐལ། ཁྱོད་ཀྱི་གཞན་སེལ་ཡོད་པའི་ཕྱིར་ཟེར་ན་རྟགས་མ་གྲུབ་པ་ཡིན་ཏེ། བརྩི་བའི་ཚེ་ན་མེད་དགག་དེའི་གཞན་སེལ་ཡོད་པར་རྟགས་མ་གྲུབ་ཅེས་རྩི་དགོས་པ་ཡིན་པའི་ཕྱིར།
ཁ་ཅིག་ན་རེ། འདུ་མ་བྱས་ཀྱི་ནམ་མཁའ་དེ་མེད་དགག་གི་གཞན་སེལ་མིན་ཟེར་ན། འདུ་མ་བྱས་ཀྱི་ནམ་མཁའ་ཆོས་ཅན། མེད་དགག་གི་གཞན་སེལ་ཡིན་པར་ཐལ། མེད་དགག་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། མེད་དགགགི་གཞན་སེལ་དང་མེད་དགག་གཉིས་དོན་གཅིག་ཡིན་པའི་ཕྱིར།
རང་གི་ལུགས་ལ། གཞན་སེལ་དང་དགག་པ་གཉིས་དོན་གཅིག་ཡིན་པས་མཚན་ཉིད་འཇོག་མི་དགོས། དངོས་པོ་ཡིན་ན་ཁྱོད་ཀྱི་དོན་རང་མཚན་གྱི་གཞན་སེལ་ཡོད་པས་ཁྱབ་ལ། དངོས་པོར་གྱུར་པའི་དགག་པ་དང་དོན་རང་མཚན་གྱི་གཞན་སེལ་གཉིས་དོན་གཅིག ། བདག་མེད་ཡིན་ན་ཁྱོད་ཀྱི་བློའི་གཞན་སེལ་ཡོད་པས་ཁྱབ་ལ། བློའི་གཞན་སེལ་དང་རྟོག་པའི་སྣང་ཡུལ་གཉིས་དོན་གཅིག ། གཞི་གྲུབ་ན་ཁྱོད་ཀྱི་མེད་དགགགི་གཞན་སེལ་ཡོད་པས་ཁྱབ་ལ། མེད་དགག་གི་གཞན་སེལ་དང་མེད་དགག་གཉིས་དོན་གཅིག་ཡིན་ནོ། །
རྩོམ་སྒྲིག་པ། བློ་བཟང་བཀྲ་ཤིས།