ས་སྐྱ་པནྚི་ཏ་ཀུན་དགའ་རྒྱལ་མཚན་གྱི་རྣམ་ཐར།

ས་སྐྱ་པནྚི་ཏ་ཀུན་དགའ་རྒྱལ་མཚན་ནི། དྲི་མེད་འཁོན་གྱི་རིགས་རྒྱུད་གྲགས་པ་རྒྱལ་མཚན་གྱི་གཅུང་དཔལ་ཆེན་འོད་པོ་ལ་མ་གཅིག་གར་ཕུ་མ་ཉི་ཁྲི་ལྕམ་ཁབ་ཏུ་བཞེས་པ་ལ་སྲས་གཉིས་འཁྲུངས་པའི་ཆེ་བ། ཡབ་དགུང་ལོ་སོ་གསུམ་དུ་ཕེབས་པ་རབ་བྱུང་གསུམ་པའི་ཆུ་སྟག ༡༡༨༢ ལོའི་ཟླ་བ་གཉིས་པའི་ཚེས་ཉེར་དྲུག་ལ་སྐུ་བལྟམས། མཚན་དཔལ་ལྡན་དོན་གྲུབ་གསོལ། སྐུ་ཤིན་ཏུ་གཞོན་པའི་དུས་ནས་ཡབ་ཀྱི་དྲུང་དུ་འབྲི་ཀློག་དང་། གསང་སྔགས་ཀྱི་དབང་ཁྲིད་མན་ངག་དུ་མ་ཞུས་ཤིང་། གསོ་བྱེད་ཀྱི་གཞུང་མན་ངག་འགའ་ཞིག་ཀྱང་གསན། ཤེས་བྱའི་གནས་ཀུན་ལ་ཐོགས་མེད་དུ་འཇུག་པའི་མཁྱེན་རབ་ཀྱི་གཏེར་བརྡོལ། གཙོ་བོར་རྗེ་བཙུན་གྲགས་པ་རྒྱལ་མཚན་སློབ་དཔོན་དུ་བསྟེན་ནས། སྔགས་ཀྱི་ཟབ་ཆོས་མཐའ་དག་བུམ་པ་གང་བྱོའི་ཚུལ་གྱིས་གསན་ཅིང་གསོ་བྱེད་སྐོར་ཡང་ཡན་ལག་བརྒྱད་པའི་རྩ་འགྲེལ་སོགས་གསན། རྟེན་དགེ་བསྙེན་གྱི་སྡོམ་པ་མནོས། མཚན་ཀུན་དགའ་རྒྱལ་མཚན་ཞེས་པ་གནང་། དགུང་གྲངས་བཅོ་ལྔར་ཕེབས་པའི་དུས་སུ་ཡབ་མེས་ཀྱི་ཆོས་མ་ལུས་པ་ཐུགས་སུ་ཆུད་པར་མཛད། དགུང་ལོ་བཅུ་དགུ་པར་དགེ་བའི་བཤེས་གཉེན་ཁུ་སྟོན་མདུན་བྱམས་ཆོས་སྡེ་ལྔ་དང་། ཚད་མ་ཀུན་བཏུས་སོགས་གསན། དགུང་ལོ་ཉི་ཤུ་པར་གཙང་ཉང་སྟོད་རྐྱང་ཐུར་དུ་ཕེབས་ནས། མཚུར་སྟོན་གཞོན་ནུ་སེང་གེ་ལ། ཚད་མ་རྣམ་ངེས་ཀྱི་བསྟན་བཅོས་ཆ་ཚང་གསན། དགུང་ལོ་ཉེར་གཉིས་པར། གཙང་ཆུ་མིག་རིང་མོར་ཁ་ཆེའི་པཎ་ཆེན་ཤཱཀྱ་ཤྲཱི་མཇལ་ཅིང་། ཚད་མ་ཆོས་མཆོག་གསན། མི་རིང་བར་ཡབ་སྙུན་གྱིས་ཟིན་པར་བརྟེན་ཆུ་མིག་རིང་མོ་ནས་ཡར་ས་སྐྱར་བྱོན། སྐབས་དེར་ཡབ་དཔལ་ཆེན་འོད་པོ་དགུང་ལོ་ང་བཞིར་ཕེབས་པ་དེ་ཉིད་ཆུ་ཕག་༡༢༠༣ལོའི་ཟླ་བ་ལྔ་པའི་ཚེས་གཅིག་ཉིན་དུས་ཀྱི་ཆོས་ཉིད་དུ་གཤེགས། ཡབ་ཀྱི་རྗེས་སུ་དགེ་རྫོགས་ཀྱི་བྱ་བ་རྒྱ་ཆེན་བསྒྲུབས།   ལོ་དེ་དབྱར་ཆོས་པ་མང་དུ་བྱུང་བས་རྣམ་ངེས་དབུ་ནས་ཆོས་ཐུན་གཅིག་དང་། གཞན་དོན་ལེའུ་ནས་ཆོས་ཐུན་གཅིག་བཙུགས་ཏེ་ཉིན་རེ་ལ་ཆོས་ཐུན་གཉིས་རེ་བཤད་པས་ཟླ་བ་གཅིག་ལ་རྣམ་ངེས་ཚར་གཅིག་གསུངས། དགུང་གྲངས་ཉེར་ལྔར་ཕེབས་པ་ན། ལོ་སྟོན་རྡོ་རྗེ་དབང་ཕྱུག་གིས་བཞེངས་པའི་ཉང་སྨད་རྒྱན་གོང་གི་གཙུག་ལག་ཁང་དུ། པཎ་ཆེན་ཤཱཀྱ་ཤྲཱིས་མཁན་པོ་དང་། སྤྱི་བོ་ལྷས་པས་ལས་སློབ། དོན་མོ་རི་པས་གསང་སྟོན་མཛད་དེ་དགེ་འདུན་འདུས་པ་རྒྱ་མཚོ་ལྟ་བུའི་དབུས་སུ་བསྙེན་པར་རྫོགས་པར་མཛད་དོ། །ལོ་དེར་སློབ་དཔོན་དེའི་མདུན་དུ་སྒྲའི་བསྟན་བཅོས་སྙིང་པོ་བསྡུས་པའི་སྟོད་དང་། ཚད་མ་རྣམ་འགྲེལ། ཚད་མ་ཀུན་བཏུས་སོགས་ཚད་མའི་སྐོར་དང་འདུལ་བ་དང་ཕར་ཕྱིན་སོགས་མདོ་ཆོས་མང་པོ་གསན།མདོར་ན་ཁ་ཆེ་པཎ་ཆེན་ཤཱཀྱ་ཤྲཱི་ནི་ཁོང་གི་སློབ་དཔོན་གཙོ་བོ་ཡིན་པས་པཎྜི་ཏ་རབ་བྱུང་གསུམ་པའི་ཤིང་བྱི་༡༢༠༤ལོ་ལ་བོད་དུ་བྱོན་ནས་རབ་བྱུང་བཞི་པའི་ཤིང་ཁྱི་༡༢༡༤ལོའི་བར་བོད་དུ་ལོ་བཅུ་གཅིག་བཞུགས་པའི་རིང་སྒྲ་དང་ཚད་མ་འདུལ་མངོན་མདོ་སྡེའི་སྐོར་གྱི་ཟབ་ཆོས་རྣམས་བུམ་པ་གང་བྱོའི་ཚུལ་གྱིས་གསན་ཏེ་སྒྲ་ཚད་མདོ་ཆོས་ཀུན་མཁས་པའི་རྕེར་སོན།  བལ་པོའི་པཎྜི་ཏ་སཾ་བྷ་ཤྲཱི་མདུན་དུ། སྒྲ་ཀ་ཙན་དབྱངས་གསུམ། སྙན་ངག་མེ་ལོང་མ། སྡེབ་སྦྱོར་དང་མངོན་བརྗོད། གཏན་ཚིགས་རིག་པ་སོགས་ཐུན་མོང་གི་རིག་གནས་མང་པོ་གསན་ཅིང་བོད་སྐད་དུའང་འགའ་ཞིག་བསྒྱུར། རི་མོ་དང་ལྷ་སྐུའི་ཆ་ཚད་དང་། ཡིག་གཟུགས་སྣ་ཚོགས། ནོར་བུ་དང་ས་བརྟག་པ་སོགས་བརྟག་པ་སྣ་ཚོགས་བཅས་བཟོ་ཡི་གནས་ཀུན་ལ་མཁྱེན་པ་རབ་ཏུ་རྒྱས་ཤིང་། ས་ཆེན་ཀུན་དགའ་སྙིང་པོའི་ནང་རྟེན་དབུ་རྩེ་སྙིང་མ་ནང་བཞུགས་པའི་འཇམ་པའི་དབྱངས་ཀྱི་སྐུ་གཟུགས་ལ་རུ་ཤིང་དང་སྤྲ་བཟོ་སོགས་རང་ཉིད་སྐུ་ངོ་མས་མཛད་པར་མ་ཟད། རྩ་རྒྱུད་ནས་བཤད་པའི་བྲིས་སྐུའི་བཀོད་པ་ཆ་ཚང་དར་དཀར་པོའི་ངོས་ལ་བྲིས་པ་དང་། དཔལ་བསམ་ཡས་ཀྱི་གཙུག་ལག་ཁང་གི་གྱང་ངོས་སུ་འཇམ་དབྱངས་ཀྱི་སྐུ་བརྙན་ངོ་མཚར་ཅན་ཕྱག་བྲིས་མཛད་པ་སོགས་ཕྱག་རྗེས་མང་དུ་བཞག་ཅིང་། ཆ་ཚད་ཀྱི་བསྟན་བཅོས་ཀྱང་བརྩམས། ཚད་མའི་བསྟན་བཅོས་རྒྱ་གཞུང་ཡོད་ཚད་གཟིགས་ཏེ་ཞིབ་དཔྱད་མཐིལ་ཕྱིན་མཛད་ཅིང་། དེ་དག་གི་སྙིང་པོ་མ་ལུས་པ་གཅིག་ཏུ་བསྡུས་ཏེ་དོན་རྟོགས་སླ་ལ་ཚིག་སྡེབ་ལེགས་པ་བོད་རང་གི་ཁྱད་ཆོས་དང་ལྡན་པའི་ཚད་མའི་བསྟན་བཅོས་ཚད་མ་རིགས་གཏེར་རང་འགྲེལ་དང་བཅས་པ་བརྩམས། རྒྱ་གར་ནས་བོད་དུ་ཡོང་ནས་ནང་བའི་བསྟན་པ་ལ་རྒོལ་བར་བྱེད་པའི་མུ་སྟེགས་པའི་སྟོན་པ་འཕྲོག་བྱེད་དགའ་བོ་སོགས་རྩོད་པའི་སྒོ་ནས་སུན་ཕྱུང་ནས་ནང་པའི་བསྟན་པར་བཀོད། རྒྱ་བོད་ཀུན་ཏུ་མ་ཧཱ་པཎྜི་ཏའི་མཚན་སྙན་ཐོབ། དབུ་གདུགས་བཅུ་གསུམ་ཐོབ་པར་གྲགས་སོ།  རིག་གནས་ཆུང་བར་གྲགས་པའི་སྐོར་ལ་སྙན་ངག་མཁས་བའི་ཁ་རྒྱན། མངོན་བརྗོད་ཚིག་གི་གཏེར། སྡེབ་སྦྱོར་མེ་ཏོག་ཆུན་པོ། ཟློས་རབ་དགའི་འཇུག་པ། རོལ་མོའི་བསྟན་བཅོས་སོགས་ཚིག་སྙན་འཇེབས་ལྡན་ལ་དོན་སྙིང་བཅུད་བསྡུས་པ་མང་པོ་བརྩམས་ཤིང་འཆད་སྤེལ་ཡང་མཛད་དེ་སྐབས་དེར་རིག་གནས་པ་ཤིན་ཏུ་དཀོན་པའི་དུས་སུ་བོད་ཀྱི་རིག་གནས་སྤྱིའི་རྨང་གཞི་གསར་དུ་བཏང་། ཁྱད་པར་ལུགས་གཉིས་ཀྱི་བླང་དོར་ཚུལ་བཞིན་འབྱེད་པའི་བསྟན་བཅོས་ལེགས་བཤད་རིན་པོ་ཆེའི་གཏེར་ཞེས་བྱ་བ་དེང་སང་འཛམ་གླིང་ཡོངས་སུ་སྙན་གྲགས་ཀྱིས་ཁྱབ་པ་དེ་བརྩམས་པས་བོད་ཀྱི་ཆོས་སྲིད་ཀྱི་བྱ་བར་ལེགས་ཉེས་འབྱེད་པའི་བློ་མིག་གསར་ཏུ་ཕྱེས་ཤིང་། མི་རྣམས་ཅི་ལྟར་འཚོ་བའི་སྐོར་ལ་བསླབ་སྟོན་བྱེད་པའི་སློབ་དཔོན་དང་། མེད་ཐབས་མེད་པའི་འཚོ་བའི་སློབ་དེབ་ཞིག་ཏུ་གྱུར། དཔལ་བསམ་ཡས་ཀྱི་བཙན་པོ་ཤཱཀྱ་མགོན་གྱིས་གདན་དྲངས་ཏེ་བསམ་ཡས་ཀྱི་གདན་སར་བཞུགས་སུ་གསོལ། ཀཱ་མ་ལ་ཤཱ་ལའི་གསེར་ཁྲིར་བཞུགས་ནས་འཆད་ཉན་རྒྱ་ཆེར་མཛད་ཅིང་བསྟན་པ་བྱི་དོར་དང་བྱང་ལྡེབས་ངོར་འཇམ་དབྱངས་ཀྱི་སྐུ་བརྙན་ཕྱག་བྲིས་མཛད། སྔོན་གྱི་ཆོས་རྒྱལ་རྣམས་ལ་བསྔགས་པའི་ཚིགས་སུ་བཅད་པ་བརྩམས། དེ་ནས་བཟུང་བསམ་ཡས་ཀྱི་གདན་ས་ས་སྐྱ་ནས་འཛིན་པ་ཞིག་བྱུང་བར་མངོན།  དགུང་ལོ་རེ་གཅིག་པ་ཆུ་སྟག་༡༢༤༢ལོར་བླ་མའི་བཀའ་ལྟར་སྔོན་འགྲོའི་ཆོས་འཁོར་ཆེན་པོ་སྐོར། རེ་གཉིས་པ་ཆུ་ཡོས་༡༢༤༣ལོར་ཧོར་རྒྱལ་གོ་ཏན་གྱིས་གདན་འདྲེན་གྱི་ཡི་གེ་དངོས་འབུལ་སྤོམ་ཆེན་བཅས་ཁྱེར་བའི་ཕོ་ཉ་མངགས་པ་འབྱོར། གདན་ཞུའི་ཡེ་གེར་འཇིགས་སློང་གི་ཚིག་འདི་ལྟར། ངས་མཐའ་ཡི་ཁྲིམས་ར་བླངས། དམག་དཔུང་ཆེན་པོས་བརྡ་དེད་བྱེད་ནས་སེམས་ཅན་མང་པོ་ལ་གནོད་པ་བྱས་ན་མི་སྐྲག་པ་ཨེ་ཡིན། དེ་ན་སངས་རྒྱས་ཀྱི་བསྟན་པ་དང་སེམས་ཅན་མང་པོ་ལ་་སོམས་ལ་ཁྱོད་མགྱོགས་པར་ཤོག་ཅེས་འཁོད།  དེ་ལྟར་འཇིགས་སྐུལ་དང་བྱ་དགའ་ཟུང་འབྲེལ་སྒོ་ནས་ཧོར་ཡུལ་དུ་ཡོང་དགོས་པར་བཙན་བཀའ་བནང་། སྐབས་དེར་ཁོང་གིས་ཐུགས་དགོང་འདི་ལྟར་འདི་ལྟར་བཞེས་ཏེ། རང་རེ་བོད་འདི་སིལ་བུར་འཐོར་ནས་བཟུང་ནང་འཁྲུག་ཁོ་ནས་དུས་འདའ་ཞིང་དེང་སང་ཡང་ཆོས་ལུགས་གྲུབ་མཐའ་སོ་སོའི་བླ་དཔོན་དང་ས་གནས་ཀྱི་འགོ་བ་ཁག་གིས་རང་རང་གི་ཆོས་གཞིས་མངའ་འབངས་རྩོད་རེས་དང་། རང་རང་གི་གྲུབ་མཐའ་དང་མངའ་རིས་ལ་ཕན་པ་ཁོ་ན་དོན་དུ་གཉེར་ནས་བོད་སྤྱི་བའི་བསམ་པ་མེད་པར་བརྟེན། དབུས་གཙང་ཁམས་གསུམ་དུ་ཧོར་དམག་འཛུལ་ནས་བསྲེགས་གསོད་ཕྲོགས་གསུམ་གྱི་ཁྲག་གི་ཁ་ལོ་བསྒྱུར་བ་ལ། ཕར་རྒོལ་གྱི་ནུས་པ་མེད་པར་གཅིག་རྗེས་གཉིས་མཐུད་དུ་མགོ་བཏགས་ཞུས་པར་བལྟས་ན། འགོག་རྒོལ་བྱེད་པ་ནི་གནས་སྐབས་གནས་མ་ཡིན་པས། འཇམ་པོའི་ཐབས་ལ་བརྟེན་ནས་དམ་པའི་ཆོས་ཀྱི་ཞགས་པ་བརྟན་པོ་དེས་ཧོར་གྱི་དམག་ངན་འབྲོང་རྒོལ་དེའི་རྐང་ལག་བཅིང་ཐུབ་ན་བོད་དང་སྐྱེ་འགྲོ་ཡོངས་ལ་ཕན་པ་བླ་ན་མེད་པ་ཞིག་འབྱུང་བར་ངེས་སོ་དགོངས་ནས་ན་ཚོད་ཤིན་དུ་སྨིན་ཡང་སྐུ་སྲོག་ལ་ཕོངས་པ་མེད་པར་ཧོར་ཡུལ་དུ་འབྱོན་རྒྱུར་ཐུགས་ཐག་བཅད། དེ་ནས་རིམ་གྱིས་ས་སྐྱ་ནས་ཁྲོ་ཕུལ་དང་། སྣར་ཐང་།བསམ་འགྲུབ་རྩེ། རིན་སྤུངས་སོགས་སུ་བྱོན་ནས་ཆོས་འཁོར་བསྐོར། ཟུལ་ཕུ་རུ་འགྲོ་མགོན་ཆོས་རྒྱལ་འཕགས་པ་དགུང་ལོ་བཅུར་ཕེབས་པ་དེའི་གཙུག་ཕུད་བཞེས་ནས་མཉམ་དུ་ཁྲིད། གསང་ཕུ་ནེའུ་ཐོག་དང་འབྲི་གོང་བཅས་སུ་བྱོན། འབྲི་ཁུང་སྐྱོབ་པ་འཇིག་རྟེན་གསུམ་མགོན་གྱིས་བསུ་བ་རྒྱ་ཆེར་བྱས་ཏེ་འབྲི་ཁུང་ལ་ཤེས་མོང་བཟང་པོ་སྩོལ་ཅིག་ཅེས་གསོལ་བ་བཏབ། དེ་ནས་རིམ་གྱིས་ཁམས་སུ་བྱོན། ཀཿ  ཐོག་དབུ་འོད་ཡེས་ཤེས་འབུམ་གྱིས་རབ་གནས་ཀྱི་ཆོ་ག་མཛད་པར་གསོལ་བ་བཏབ་པས་ཞལ་གྱིས་བཞེས། བགེགས་སྐྲོད་པ་དེ་ངེད་རྙིང་མ་བས་བྱེད། ཡེ་ཤེས་བཞུགས་པ་ལ་ཁྱེད་གསར་མ་བས་མཛད་ཅེས་ཞུས་པར་བརྟེན་རབ་གནས་གྱིས་བཀའ་དྲིན་བསྩལ། འབའ་ཐང་བརྒྱུད་ལི་ཐང་ནས་ཉག་ཆུ་བརྒལ་ནས་རབ་སྒང་དང་། དེ་ནས་བཞག་ར་ལྷ་རྩེ་བརྒྱུད་དར་རྩེ་མདོར་ཕེབས། མགོ་ཐོམ་ཡུལ་གྱི་སྐད་རིགས་མི་གཅིག་པའི་མི་མང་པོ་ཡང་སངས་རྒྱས་པ་ལ་བཙུད། ཧ་ཀ་ལིང་རྩེ་རྒྱུད་ནས་ཤིན་ཏུ་དང་། གླང་ཆེན་འགྱིང་རི་དང་། ཀོང་ཚེ་འཕྲུལ་རྒྱལ་གྱིས་བཞེངས་པའི་རྒྱལ་བོའི་སྐུ་མཇལ་ནས་ཉིན་ཞག་བཅུ་འདས་པའི་མཚམས་བློན་པོ་འགར་བྱོན་མྱོང་བའི་རྐྱང་མི་ནས་འབབ་མི་ཆུ་བོ་བརྒལ་ཏེ་རི་བོ་རྩེ་ལྔ་ནས་ཡུལ་བྱང་ངོས་ཀྱི་མི་ཉག་ཏུ་བྱོན། དེ་ཚེ་མདོ་ཁམས་སྟོན་པ་བློ་གྲོས་རབ་གསལ་སོགས་ལ་ཆོས་ཀྱི་དྲིས་ལན་མང་དུ་གནང་།  དེ་ནས་དགུང་ལོ་དྲུག་བཅུ་རྩ་ལྔ་བཞེས་པ་མེ་རྟ་༡༢༤༦ལོའི་ཟླ་བ་བརྒྱད་པ་ལ་ཧོར་རྒྱལ་པོའི་རྒྱལ་ས་ལང་གྲུར་གདན་ཕེབས་ཏེ་དེའི་དུས་སུ་རྒྱལ་བོ་གོ་ཏན། གོ་ཡུག་གན་རྒྱལ་སར་སྟོན་པ་ལ་ཧོར་ཡུལ་དུ་བཞུད་ནས་ཚུར་བྱོན་པ་དང་མེ་ལུག་༡༢༤༧ལོའི་ཟླ་བ་དང་པོར་མཇལ། རྒྱལ་པོ་མཉེས་ཏེ་དེང་ཕན་ཆད་གྲལ་གྱི་མགོར་བླ་མ་བཞུགས་ལ། སྨོན་ལམ་ཐོབ་ཅིག་ཅེས་ལུང་ཕབ། དེ་ནས་ཧོར་གྱི་རྒྱལ་ཁམས་སུ་རབ་ཏུ་བྱུང་བའི་དབུ་འཕང་དགུང་དུ་བསྟོད། སྐབས་ཤིག་ན་རྒྱལ་པོ་ལ་མཛེ་ནད་བྱུང་བས་ཆབ་གཏོར་འཇམ་དཔལ་མ་དང་འཕགས་པ་སེངྒེ་སྒྲའི་ཆོ་ག་མཛད་པས་རྒྱལ་པོ་ནད་ལས་ཐར་བས་ཤིན་ཏུ་དད། ཐེག་ཆེན་སེམས་བསྐྱེད་སོགས་ཟབ་པ་དང་རྒྱ་ཆེ་བའི་ཆོས་དུ་མ་ཞུས། མཆོད་གནས་ཀྱི་ཕུད་དུ་བཀུར། སྐད་རིགས་མི་གཅིག་པའི་འགྲོ་བ་ཆོས་ལ་མི་དད་པ་རྣམས་ཆོས་ལམ་དུ་ཚུད་པར་གནང་།  དེ་ནས་བོད་དུ་འབྱོན་པ་བས་བྱང་ཕྱོགས་སུ་བཞུགས་ན་བོད་ཀྱི་བསྟན་སྲིད་ལ་ཕན་ཆེ་བར་གཟིགས་ནས་བོད་ཀྱི་གྲྭ་སློབ་རྣམས་ལ་གནང་སྦྱིན་མང་པོ་དང་ཆོས་ཀྱི་སྐྱེས་སུ་༼     བྱང་ཆུབ་སེམས་དཔའི་ལམ་ལ་འཇུག་པའི་རིམ་པ་ཐུབ་པའི་དགོངས་པ་གསལ་བ  ༽ཞེས་བྱ་བ་བསྐུར། ཚོགས་ཆོས་འདི་དབུས་གཙང་ཁམས་གསུམ་དུ་ངས་ཐམས་ཅད་ལ་བཤད་པ་ཡིན་པས་ཡི་གེ་འདི་ལྟོས་ལ་ཤོད། འདི་བཞིན་ཉམས་སུ་ལོངས་ཞེས་བཀའ་བསྩལ། རྒྱ་བོད་ཧོར་གསུམ་དུ་ཆོས་སྲིད་ལུགས་གཉིས་ཀྱི་ལེགས་ཉེས་འབྱེད་པའི་བློ་གྲོས་ཀྱི་སྣང་བ་དམ་པ་བསྩལ། ཡུལ་དུས་ཀུན་དུ་དམ་པས་བྱ་བ་ཁོ་ནར་བརྩོན།  མདོར་ན་སྐུ་ཚེ་ཧྲིལ་བོར་སངས་རྒྱས་ཀྱི་བསྟན་པ་དང་བོད་མི་རིགས་ཀྱི་ལ་རྒྱ་དང་ཕུགས་བསམ་ཁོ་ནར་ཐུགས་བརྩོན་མཛད་དེ་དུས་འདའ་བར་གནང་།  དགུང་ལོ་བདུན་ཅུར་ཕེབས་པ་ན། དབོན་འཕགས་པ་དགུང་ན་བཅུ་བདུན་ལས་སོན་མེད་ཀྱང་ཐུགས་རིག་གསལ་ཞིང་ལུགས་གཉིས་ཀྱི་བསླབ་བྱ་ཡང་ཡུན་རིང་ཙམ་ཐོབ་པར་བརྟེན་མ་འོངས་པར་ཆོས་སྲིད་ཀྱི་འགན་ཤུལ་འཛིན་བྱ་རྒྱུར་དགོངས་ནས་ཆོས་དུང་དཀར་པོ་དང་སྐུ་ཉིད་ཀྱི་ལྷུང་བཟེད་སོགས་དང་སློབ་མའི་ཚོགས་དུང་དཀར་པོ་སྐུ་ཉིད་ཀྱི་ལྷུང་བཟེད་སོགས་དང་སློབ་མའི་ཚོགས་རྣམས་ཀྱང་གཏད་དེ། ད་ནས་བཟུང་བསྟན་འགྲོའི་དོན་རླབས་པོ་ཆེ་སྒྲུབས་ཤིག་ཅེས་བསྒོས། དེ་ནས་མི་རིང་བར་ལང་གྲུའུ་སྤྲུལ་པའི་སྡེ་ཞེས་བྱ་བར། བོད་རབ་བྱུང་བཞི་པའི་ལྕགས་ཕག་༡༢༥༡ལོའི་ཟླ་བ་བཅུ་གཅིག་པའི་ཚེ་བཅུ་བཞི་ཉིན་སྐྱ་རེངས་ཤར་བ་ཙམ་ལ་རྡོ་རྗེ་དྲིལ་བུ་ཕྱག་གཉིས་ཀྱིས་ཐུགས་ཀར་བསྣོལ་ཐབས་སུ་བཟུང་ནས་ཡོངས་སུ་མྱ་ངན་ངས་འདའ་བའི་ཚུལ་བསྟན་ཏོ།  བདག་ཉིད་ཆེན་པོ་འདི་ཡི་གདན་ས་ཆེ་བ་དཔལ་ལྡན་ས་སྐྱ། བྱང་ཕྱོགས་ལིང་ཆུ་རྩེར་ཁབ། བར་བ་བསམ་ཡས། ཉང་སྟོད་རྐྱང་ཐུར། ཤང་སྲེགས་ཤིང་། ཆུང་བ་དབུས་གཙང་ཁམས་གསུམ་ན་ཤིན་ཏུ་མང་བར་བདག་གཉེར་མཛད་ནས་སྤྱིར་མདོ་སྔགས་ཁྱད་པར་རྣམ་འགྲེལ་སོགས་མཚན་ཉིད་ཀྱི་བཤད་སྲོད་ཧ་ཅང་དར་རྒྱས་བྱུང་།  བསྟན་རྒྱུན་འཛིན་པའི་བུ་ཡང་ཐུགས་སྲས་འགྲོ་མགོན་ཆོས་རྒྱལ་འཕགས་པ། མཚན་ཉིད་ཀྱི་ཚོགས་དཔོན་འུ་ཡུག་པ་རིག་པའི་སེངྒེ། སྔགས་ཀྱི་ཚོགས་དཔོན་ཞང་བཙུན་མདོ་སྡེ་དཔལ། སྤྱི་དཔོན་ཏེ་ཉེ་གནས་སུ་དགེ་བཤེས་ཤཱཀྱ་བཟང་བོ་སོགས་རྒྱ་བོད་ཧོར་གསུམ་དུ་མཁས་དང་གྲུབ་པའི་སློབ་མ་མང་དུ་འཕེལ། བཀའ་འབུམ་ལྡེབ་རིང་མ་སྡེ་དགེའི་པར་མ་པོད་གསུམ་སྟེ་ཆོས་ཚན་བརྒྱ་དང་བདུན། ཤོག་གྲངས་དགུ་བརྒྱ་དང་དྲུག་བཞུགས་སོ།།