བཅོམ་ལྡན་རིགས་པའི་རལ་གྲི་ནི་བོད་དབུས་གཙང་ཁམས་གསུམ་ལས་དབུས་ཀྱི་བྱེ་བྲག་ལྷོ་ཁར་དཔལ་བསམ་ཡས་ཀྱི་ཉེ་འགྲམ་ཕུ་ཐང་གི་སར། བོད་རབ་བྱུང་བཞི་པ་སྤྱི་ལོའི་དུས་རབས་བཅུ་གསུམ་པའི་བཅུ་ཚན་གསུམ་པ་ཙམ་ལ་སྐུ་བལྟམས། བྱིས་པའི་དུས་ནས་སྤྱང་གྲུང་འཛོམས་པ་ཞིག་ཡིན་པར་བརྟེན། ཡབ་ཡུམ་གྱིས་བསམ་ཡས་མཆོད་རྟེན་དཀར་པོར་བཙུན་པ་བྱེད་དུ་བཅུག དེར་ལོ་ཤས་རིང་ཡོན་ཏན་གྱི་གཞི་ལེགས་པར་ཚུགས་པའི་རྗེས་སུ་དགའ་བ་གདོང་དུ་བྱོན་ནས། སློབ་དཔོན་ཉི་མ་བརྩོན་འགྲུས་མདུན་ཕར་ཕྱིན་གྱི་གཞུང་གསན། ཡུན་རིང་མ་སོང་བར་མཛེ་ནད་ཀྱིས་ཟིན་པའི་རྣམ་རྟོག་ཤར་བར་བརྟེན། སློབ་དཔོན་ལ་དགོངས་པ་ཞུས་ནས་གཙང་སྣར་ཐང་གི་དགོན་པར། སྐྱོ་སྟོན་པའི་དྲུང་དུ་ནད་བཅོས་ལ་བྱོན། སྐྱོ་སྟོན་པས་ཁྱེད་ཀྱི་ནད་འདི་ལ་བཅོས་ཐབས་གཞན་མི་དགོས། ཁྱེད་རང་ཚད་མ་རྣམ་ངེས་ཀྱི་གཞུང་འདི་གྲོག་སུལ་ཕ་གིར་སྐྱོར་དང་གསུངས་ནས་རྣམ་ངེས་དཔེ་ཆ་ཞིག་ཕྱག་ཏུ་གཏད། དེ་ནས་གྲོག་ཕུག་ཅིག་ཏུ་བཞུགས་ནས་རྣམ་ངེས་ཚར་སྟོང་ཕྲག་ཁ་ཤས་བསྐྱར་བས་མཛེ་ནད་རྩ་མེད་དུ་སོང་། ཐུགས་ཤིན་ཏུ་དགྱེས་ཏེ་སྣར་ཐང་གི་ཆོས་གྲྭར་ཞུགས། སྐྱོ་སྟོན་དང་། རོང་བ་ཤེས་རབ་སེང་གེ བླ་མ་ཆེན་པོ་ཀུན་དགའ་རྡོ་རྗེ་སོགས་མཁས་གྲུབ་དང་སྐྱེས་བུ་དམ་པ་མང་པོ་ལ་མདོ་སྔགས་རིག་གནས་མ་ལུས་པ་གསན། ས་སྐྱའི་བླ་མ་ཤར་པ་འཇམ་དབྱངས་རིན་ཆེན་རྒྱལ་མཚན་ལས་ས་སྐྱའི་ཟབ་ཆོས་མ་ལུས་བུམ་པ་གང་བྱོའི་ཚུལ་དུ་གསན། མདོ་སྔགས་རིག་གནས་རྒྱ་མཚོ་ལྟ་བུའི་ཕ་རོལ་ཏུ་སོན་ཅིང་མཁས་པའི་གྲགས་པ་དབུས་གཙང་ཀུན་ཏུ་ཁྱབ། སྣར་ཐང་དུ་མཁན་པོ་མཛད་སྐབས་བོད་ཀྱི་སྡེ་སྣོད་འཛིན་པ་སུམ་གཉིས་ཙམ་སྣར་ཐང་དུ་འཛོམས། རྗེས་སུ་ཐར་པ་གླིང་དུ་བྱོན་ནས་ཚོགས་ཆོས་ཡུན་རིང་གསུངས། སྣར་ཐང་གི་མཆིམས་འཇམ་དབྱངས་དང་། དབུས་པ་བློ་གསལ་སོགས་སློབ་མ་མཁས་ཆེན་མང་པོ་བྱོན།  གསུང་རྩོམ་ཡང་པོ་ཏི་བཅུ་དྲུག་ཙམ་ཡོད་པར་གྲགས་ཀྱང་དུས་དབང་གིས་ཕལ་ཆེ་བ་ཐོར་བར་གྱུར། དེང་སང་ཚད་མའི་སྐོར་ལ་སྡེ་བདུན་རྒྱན་གྱི་མེ་ཏོག་དང་། རྣམ་ངེས་རྒྱན་གྱི་མེ་ཏོག རྣམ་ཐར་སྐོར་ལ་སྐྱེས་རབས་རྒྱན་གྱི་མེ་ཏོག་དང་བླ་མ་དཔྱལ་པའི་གདུང་རབས་རིན་པོ་ཆེའི་ཟ་ར་ཚགས། སྣར་ཐང་བཀའ་དང་བསྟན་འགྱུར་ཐོག་མར་བསྡུ་སྐབས་ཀྱི་དཀར་ཆག་བཅས་བྲིས་མ་ཡིག་སྙིང་དེ་དག་ཀྲུང་གོའི་མི་རིགས་དཔེ་མཛོད་ཁང་ཏུ་བཞུགས་སོ།།

རྩོམ་སྒྲིག་པ། འཇམ་དབྱངས།